Véur t aailand van Hans Christian

Drift zulver op t zolte nat
En schittert ien n zunnebad
De wiend speult mit t oppervlak
En poest de hemel stroalend strak
De hoeskes binnen van fondant
Is dit meschain n sprookje – want

Op t aailand van Hans Christian

Doar doekedoeken zun en moan
Om t aander dag en nacht t groan
Op kloare nachten wordt n boog
Tot t duustern oet – tot hemelshoog
Over de daipste steerns spand
Is dit meschain n sprookje – want

Op t aailand van Hans Christian

Doar zingt de branden veur het laand
En vlijt n kanten kroag op t zaand
Doar gruit en bluit n overdoad
Stoan stokrozen gewoon op stroat
Gruien sirenen tot op t strand
Is dit meschain n sprookje – want

Op t aailand van Hans Christian

Doar bringt de mörn kleur en daauw
Is Oostzee touglieks gruin en blaauw
Gehaime kleuren van opaal
k Verwonder mie – en vroag mie aal
Ik kwam hier toch as lanterfant ?
Is dit meschain n sprookje – want

Op t aailand van Hans Christian
Doar kwam ik aan as rekreant
Mor k goa weerom as òfgezant