Die Welt sollte genesen
Ook dit onschuldeg strand
Wurde vom Deutschen Wesen
Verkracht ien groepsverband

Hier baauwden de Teutonen
Aan t doezendjoareg riek
n Drifteg volk van klonen
Verniend en fannetiek

Mit schiere hoge petten
En ien paradepas
Mit alerkörtste metten
Aal onnut aan t gas

n Leer van Blut und Boden
n Macht zunder perdon
Mit viefteg miljoun doden
En rücksichtslos betun

Woorden om t oet te leggen
Dij binnen op de vlucht
Dij loaten zok nait zeggen
Gain lettergreep – gain zucht

De aiveghaid zel t kloaren
Het tij mokt alles kwiet
Het honderddoezend joaren
Keer doezend joar aan tied