Hestoe wel heurd van Rigo de Reus ?
Dij Rigo is aigelks vanolds nog n geus
Elk dij wat beleven wil dij geef ik de road
Goa kieken en roeken op Röttemerploat
t haile joar ligt doar – dat is fabuleus
n Reus as n waalvis zo groot – serieus
Mit zeewier en gras ien zien eulifantsoren
Is wieder nait zoveul meer aan te verkloaren
De maiwen dij kaalken hom stoadegaan wit
Moar t liekt der nait op dat hai doar onder lidt
t Is n gedounte doar – wat n bedrief
De zeehonden klettern hom over zien lief
De krabben dij knippen en scheren zien board
Gain reus is zo loi en onschuldeg van oard
De zun waarmt zien kroakende – noakende leden
Zo ligt hai doar stil en reusachteg te weden
De wind kroelt hom speuls deur zien warege hoar
Gain ongemak deert hom – gain angst veur gevoar
De branden dij baldert en daldert n laid
Lichtschoon of – routduuster – dij reus het gain wait
Kop schuuns tegen t duun – de vöddels noar zee
Van vrouger of loater het hai gain idee
Mit knijen omhoog en mit hakken ien t zaand
Van kold of van hait nog gain krummel verstaand
Hai brobbelt wat – poest wat – en stìnt wat en snort
Hai kochelt wat – rochelt wat – piept wat en knort
Zo gaait dat al wel vanof tiedstieden heer
Hail enkeld bie haarstdag komt hai ien t geweer
Allint mor veur nood – bie n vlaigende störm
Din eerst wordt hai wakker – dij sjompege slörm
Din sjort hai zok beetje bie beetje ien t ind
Zok even bewegen – dat is hai nait wind
Din zweert hai – din reert hai – gun mie ook mien meug
Want zo holdt n reus ja zien vöddels nait dreug !
Din stapt hai noar t wotter – hail draaigend en woest
Staait doeknekt – hai schoembekt en schudt mit n voest
Scheldt tegen de branden en tegen de wiend
Ropt tegen de golven wat hai der van vient
Grolt tegen de wolken – belkt tegen de zee
Zuik joe veur dit wotter n vaaileger stee !
En din – din is t net of de wind even zucht
Want din keert het tij – en het wotter dat vlucht
Eerst langzoam – din gaauwer – as t ainmoal wil wieken
Din wringt t zok – kolkt t en schuurt t laangs dieken
Noar kusten wied vot – van aandere landen
Noar duustere daipten – noar zunneger stranden
Het wotter vient aaltied en aiveg zien weeg
De zandploaten dreugen – en t Wad stroomt weer leeg
Din eerst is ons Rigo n beetje gerust
As t mout staait hai op en beschaarmt hai de kust
Oeteindelk din gaait hai – of t vroug is of loat
Weer liggen te dreugen op Röttemerploat