Maaimoand – t was even onder Spiek
n Laid – dit is t begun
Wit vlindertje zat brak en briek
Te dreugen ien de zun
Wat zai ik – zee n blinde mug
Bistoe nait integreerd ?
Din vot weerom mit die – en vlug
Of zai ik dat verkeerd ?

Mor de widde vlinder vloog – tegen de blaauwe lucht omhoog

Ien junimoand – t was achter Mij
Zat hai ien t mörnlicht
Zien vleugelspan zo wit as snij
Ging toerloos – open – dicht
n Sprinkhoan op n zunnepit
Zol hom zien zeden leren
Gain waark gain hunneg doe – en bidt
Ien de Vreze des Heeren

Mor de widde vlinder vloog – tegen de blaauwe lucht omhoog

t Was julimoand – ook in Doodstil
En t vlindertje haar kozen
Veur wat hoast elke vlinder wil
n Stroek mit rooie rozen
Stoef bie hom zee n laankpoter
Waistoe nait wel ik bin ?
Ik moak die groot en groder – grootst
Kom mit mie – alles kin

Mor de widde vlinder vloog – tegen de blaauwe lucht omhoog

Augustusmoand – mit zudenwind
Is t leven nait te stoer
De widde vlinder vloog omtrint
Bie Taisn en Ten Boer
Kom even proaten – zee n spin
Ik nuig die ien mien web
Rustie mor oet en vlaig der in
Din wait ik wat ik heb

Mor de widde vlinder vloog – tegen de blaauwe lucht omhoog

Septembermoand – net onder Stad
Aan kaant van Paaizermoa
Van Noord noar Zuud nog aal bie ’t pad
De zummer achternoa
Dou kwam ien ainen onder t goan
n Drager op hom of
Dij kaauwelde – Hey doe – what ’s new ?
Come on – let ’s go – make love

Mor de widde vlinder vloog – tegen de blaauwe lucht omhoog

Oktobermoand – woaraarns bie Nörg
De zun ston blaik en leeg
Mor t vlindertje nog zunder zörg
Zat rusteg op n heeg
n Tiekje van Ons Laimeneer
Ruip – t wordt tied veur die
Dien indje is der dammee heer
De zummer is veurbie

Mor de widde vlinder vloog – tegen de blaauwe lucht omhoog

Zien moe haar honderd kinder
Te danken aan zien voar
Zo gaait dat bie de vlinders

Van joar op joar op joar op joar op joar op joar op joar op joar…………..