Refraain : Dit is de tango op de bloaren
Van n laange rieg van joaren
t Is de tango van de stieve ruggegroat

Van het stoadegaan bedoaren
Van de leste grieze hoaren
 t Is de tango van weer netjes in de moat

Dit de tango van de swoarege gedachten
Van aal mor dinken aan dij mooie tied van dou
Dit is de tango van de sloapeloze nachten
Van vrede stichten willen – mor nait waiten hou
Dit is de tango van nait meer te veul verwachten
Behaalve of en tou n oape oet de maauw

Dit is de tango van mor rusteg aan bie t vrijen
Want vot om t houkje loert meschain wel n attak
Dit is de tango van het knutern op de knijen
Vanwegens t ain of t aander lulleg ongemak
Ien stee van even as vanolds ien handen spijen
Aingoal dij tango van gedureg briek en brak

Dit is de tango van t stoadegaan verslieten
Veur olderdom – zegt dokter – heb k gain medesien
De tango van bie t oavendrood wat noagenieten
Van ale kwoaltjes mit- en kwoaltjes zunder pien
Dit is de tango van t gezelleg kniezebieten
Aalbaaide mit n glaske zoere widde wien

Dit is de tango van de ofgezakte billen
Dit is de tango van – Wat zeden ie – wablief ?!
Dit is de tango van de poeiers en de pillen
En van de zinkens en de zenen in mien lief
Dit is de tango van ik zol wel ais wat willen
Meschain heb ik hom mit de feestdoagen weer stief