Refraain : Septembermoand dou von ik die
Zunder n woord verston ik die
t Was doalek dou of kon ik die
Ien vrouger tied verzon ik die
t Was mor even – vlogen wie
Aan steerns zun en moan veurbie……veurbie

Domt komt ons t veujoar in de muid
As swalfkes din weer kommen
Is t aal weer lekkerroek en zuit
En swoar van blad en blommen
Maaimoand is as n schilderij
Mit widde – mooi melaifkes
Onschuldeg – rij en noagelnij
As onbeschreven braifkes

n Zummeroavend – peerden stoan
Verstild bie t hek te dreumen
Veurdat de zummer kin vergoan
Zel zun hom nog omzeumen
Mit rond om rond n lust veur t oog
n Feest bie zien vervoaren
Mit kleuren van de regenboog
En vonken op de moaren

Wat komt – en wat juust nait meschain
Wat is doar aan te keren
t Is aaltmoal nait te veurzain
Wie zellen ons wel weren
En ien dezember is t weer op
En ale vogels swiegen
Mor t ankom joar hangt ien de knop
Aan takken en aan twiegen

De tied draait deur en tegen t lest
Din heuren wie bie d olden
Wat was der din nog beter west
As om van die te holden
Ik zel die weer n laidje vangen
As eerste bloader valen
De klanken aan dien oortjes hangen
As glinne liesterkralen