Ien verloren veujoarsdoagen
Juig ik – juchterde bie vloagen
Bin k sums aan de kledder sloagen
Der in op – der tegen ien

Wiezen – kniezen – kniepen – liepen
En nait heuren – nait begriepen
Maddeln – spaddeln – spereweren
Doekeln – stroekeln – aalbegeren
Aal vannijs – wel honderd keren
En oeteindelk – luustern leren

Over aal mien zummerdoagen
Heb k zo goud as niks te kloagen
Woarom zel ik mie din ploagen
Ik bin liek mit elkenain

Overjoarege verwieten
Wil ik gain menuut aan slieten
k Loat mie nait mien smoak bedaarven
Gain verleden zunder schaarven
Ik heb gain talent veur spiet
Make me happy – moak mie blied

Ik wil dis novemberdoagen
Sums en din de tied vertroagen
Stilstoan – noar de weerde vroagen
Van n haandvol slovve eerde

Weerde van n haandvol kloetjes
Vreugdeloze dreuge doetjes
Noar wat geven is en nomen
Noar de bloader van de bomen
Stof tot stof – aal haalf vergoan
Noar de weerde van n troan

Dammee – ankom winterdoagen
Wil ik tegenslag verdroagen
Wil ik mien gebainte schroagen
Tegen kòl – en tegen wind

Ik heb mien geroamte kregen
Tegen störm – en tegen regen
Om mie asmis – wat te weren
Om te goan – en mie te keren
Tegen wat – zover as k wait
Staait veur ongerechteghaid