Vandoag n haile diskussie mit mien dochter en schoonzeun over t veur en tegen van  subsidies op kunst. t Ging nait zozeer om heur- of mien geliek of ongeliek, mor meer om te probaaiern zicht te kriegen op watter meugelk gebeurt as de botte biel van de ankommen bezunegings, aal dij kunstemoakers de biestand iensluust. (Kinnen ze eindelk ais leren wat aarbaiden is.)

As dat gebeurt din kinve noar de wetten van t domino-effekt de kunstakkedemies en konservatoria dichtgooien.
Din gaait dij haile, onproduktieve handel ien de oetverkoop. Din loaten we  gewoon de “marktwerking” zien gezegend waark doun. Leve de kaalslag.

Watter oeteindelk overblift  is de kollektebus van t  Anjerfonds.  Gain nood dus veur de bloaskapel- de ploatseleke  tenailverainen  en t twijstemmeg shantykoor.
t Minesterie kin opheven worren en Grode Geert krigt zien zin.

Wat zellen ale grutters en grootgrutters ien dit polderlaand din toch schatriek en overgelukkeg worren van aal dat vrijkommende geld.
Meschain dat ze der din wat voaker tou overgoan kinnen om t veurbeeld te volgen van onder andern de beheerder van t EEMSHOTEL IEN DELFZIEL.

Wieder lezen »

Moi,

k Bin al weer n week op stee ien n Daam.
Gusteroavend op fiets deur de dreven.
t Hogelaand is hail mooi mor nait te vergelieken mit Noorwegen.

Hail bovenaan op de Nordkapp van dat sprookjeslaand was t veur n dag of tien leden mor twij groaden. Nadde snij onderwegens en rendieren op weg.
n Ainzoam tiedloos landschop rolde onder auto deur; baargen, gletsjers, ies, snij, dook. n Roege, wonderschone wereld onder grille luchten.
De kolle wiend, de middernachtzun en de ontelboare wottervalen vertelden ons heur verhoal over aiveghaid en ik probaaierde doar wat van te begriepen. Mor aiveghaid in zien gehail is ja nait te bevatten….doarom heb k der toch wat mit, want ik mag groag speulen mit wat in wezen veur aiveg onbegriepelk blieven zel.
Wieder lezen »

Kreeg ik guster mor zo n meeltje van Free Westerhoff.  As ik Free zien site bekiek, din is Free n soort veelpleger. Gain krimineel vanzulf, en zeker gain draaideurkrimineel mor wel n draaideurdounder.  Free is schriever/dichter/zanger/filmer en ook nog scheuvelloper. Veuraal dat scheuvellopen van Free vervult mie mit ontzag want Free het al tig moalen mitdoan aan twijhonderdkilemetertochten. (Weissensee en zowat meer)

Wat dat scheuvellopen veur miezulf betreft; ik bin nog smui en vereg zat mor zo gaauw dat ik mien scheuvels onder heb, krigt mien zulfvertraauwen n
giga opdonder, zodoaneg datter van mien moteriek mor waaineg overblift.
Wieder lezen »

EVEN VEUR ALES AAN: K ZIT MIT BERT RIDDERBOS IEN N TWIJSPAN  ONDERWEGENS NOAR N CD MIT 16 NUMMERS
(MAINST NIJ MATERIOAL,  AANVULD MIT N POAR NUMMERS DIJ
NOG NOOIT EERDER OPNOMEN BINNEN. )

WOARAARNS  ANKOM OKTOBER/NOVEMBER  KOMMEN WE MIT T WOTTER VEUR DE DOKTER. T WORDT N SCHIERE BOUDEL – HOL  DIS WEBSTEE DOAROM GOUD IEN DE GOATEN ! 

……………………………………………………………………………………………..

Iesland,

Op Iesland heb k vleden joar n laange ballade schreven over de speulse wind dij over dat sprookjesachteg mooie aailand waait.
Dat laand mit zien aalsmor daldernde, beulende wind het zo n daipe indruk op mie moakt dat ik t opnomen heb in mien testemint.
Wieder lezen »

Oh volk van onder Zwolle en aan aander kaant van t IJsselmeer!
Wel van joe maint dat de Grunneger toal mainst boers- en lomp- en swoar is?
Ik zeg joe dat ons toal licht en luchteg- laif en kloar is.

n Verlaifde Grunneger kin sweven.  Nou ja, dat is meschain wat overdreven…..mor toch….gooit hai bieveurbeeld zien aarms as twij vleugels bezied, din komt hai mit gemak over ain nacht ies. Din komt hai, zunder n spoor achter te loaten over t zaachte zaand van Schier of Rottemerploat. Din lat hai op n kloare winterse morn nog gain voutstap achter op t widde loaken van vris valen snij.
Wieder lezen »

EVEN VEUR ALES AAN:
OKTOBER/NOVEMBER KOMT DER N SPAIGELPLOAT OET MIT
VATTIEN OF ZESTIEN NUMMERS  (MIT O.A WADWERDERWEG)
MOR VEUR T GEVAAL DAT IE  T ZOLAANG NAIT WACHTEN KINNEN:
KLIK OP “LUUSTERN”  

                              ………………………

WADWERDERWEG

Ik road joe aan om t ambt van kommesoares van de keunegin nait te onderschatten. Denk mor nait dat t bieveurbeeld Henk Vonhof gegeven was om moar willekeureg op elke aanboden stoul ploats te nemen. Doar wer nait aaltied bie stil stoan en de gevolgen waren sums bedinkelk.
Ien t Provinciehoes was dat n beste zet leden gelukkeg beter regeld.
Der was dou ien dat gebaauw wat te doun mit amateurkunsten….ik der ook maank mit mien Grunneger verskes. Ons oldste dochter Vita was nog mor drij joar en zo zaten wie doar te wachten tot ik ook aan beurt was.
Wieder lezen »

Oh dij stoere beguntied dou ons Laimeneer n kosmies ogenblikje veur zien spaigel ston.
Zo stoens en lelk dat hai zokzulf nait velen kon.
Verheerd en riddersloagen – vruig hai: “Mag ik mie vroagen?
Din zeg mie even wat mie scheelt”
“Din luuster”‘, zee zien spaigelbeeld.
“De woarhaid is – ie doun te min veur ain dij ales wait en kin
Ie kommen om van ainzoamhaid.
Leg doalek deel joen vroren klaid
Ien stee van te verleppen
Pak op joen raif en scheppen!”
Wieder lezen »

Elk zien aigen horn en houk, doar bin k glad veur.
Elk zien hail biezunder bouk, mien idee
Elk de woarhaid ien pacht, dat wordt al wat minder want ik kin haildal niks mit gounent dij beweren datter gain dood is veur ain dij mor recht devoot is.
Ik kin niks mit lu dij zok verlicht of beveurrecht vuilen op grond van
dogma ‘s. Lu dij mainen dat zai de woarhaid ien pacht hebben op grond van vrumde, onnure aannoames. Wat mout ik mit bizarre wetten, straffen, veurschriften, geboden, verboden en diskriminerende overtugens?
Meet ik heur doun en loaten òf aan n begrip as medemenselekhaid, din is heur handel en wandel sums bie t kriminele òf. Wat mout ik ien dizze barre, zogenoamd verlichte tied mit aal dij wraide absurditeiten van t christendom en de achterlekhaid van de Islam?
Wieder lezen »

Ik wait nog hou ons laifde geboren wuir.

Zai zette zok op n kruk stoef noast mie aan de bar van Hotel Café Restaurant  t Gemeentehuis ien Oethoezen en begunde doalek n aandachtege studie te moaken van mien profiel. “Doe bist t hailemoal”, zee ze noa n zetje, en ik docht: ” Bin ik ien de hemel ? Heb ik t leste oordail en ale aandere oordailen meschain nait heurd of oversloagen ?”
Ien gedachten beloofde ik miezulf om t overaal mit heur te doun. De koelkaast zol wel te klain wezen en te vris, en t bagagenet ien traain wel lekker luchteg mor veuls te krap. Veur mien geestesoog schoof n hemelberre mit gedienen van velour. t Ston ien n verloaten sirkustent, liek in de midden van de piste. Even loater ston t op diek bie de punt van Raaide. Ik zag t stoan middenmaank de zaarken op diek bie Oterdom. t Ston net geliek doar ik wol dat t ston.
“Ik bin traauwd”, zee ik. “Ik ook”, zee zai, en dou zeden wie n haile zet gedureg niks en nog drijmoal niks as niks en naks. “Wat n kloet van maaid””, docht ik, “goud strak ien t vel en zai loenst ook nog n beetje dij laaiverd”.  
Wieder lezen »

Grunobuurt – Stad – 1951

Grunobuurt schoedelt zok aigelks zowat tegen t sentrum van Stad aan.

Mor ien 1951 laag dat buurtje zo n beetje op schaaiden van Stad en de waailanden aan baaide kaanten van t Hoornsedaip. t Was der mooi wonen zo stoef bie t Stadspaark. Veuraan bie de grode speultoen, ien n luddek gebaauwtje, wer der veur de pries van n dubbeltje, mit regelmoat n fulm vertoond van de Dikke en de Dunne.
Middenmaak t gewuil ston ik doar din mit handen op rug, te wachten tot deuren van t Walhallah open goan zollen. t Koartje tussen doem en wiesvinger. Naauw roemte om mie te bewegen. En dou op n dag….floep…. wer mie t koartje tussen de vingers oettrokken….vot….spoorloos verswonnen. En gainain haar wat zain. Veur eerste moal ien mien leven was k bestolen. Ik runde verbalderd noar hoes, dee mie beklag ien geuren en kleuren. Mor moeke dee miegaauw n noagelnij dubbeltje, zo binnen moekes nou ainmoal en net op tied veur de veurstellen was k al weerom.  Wieder lezen »