Vandoag n haile diskussie mit mien dochter en schoonzeun over t veur en tegen van  subsidies op kunst. t Ging nait zozeer om heur- of mien geliek of ongeliek, mor meer om te probaaiern zicht te kriegen op watter meugelk gebeurt as de botte biel van de ankommen bezunegings, aal dij kunstemoakers de biestand iensluust. (Kinnen ze eindelk ais leren wat aarbaiden is.)

As dat gebeurt din kinve noar de wetten van t domino-effekt de kunstakkedemies en konservatoria dichtgooien.
Din gaait dij haile, onproduktieve handel ien de oetverkoop. Din loaten we  gewoon de “marktwerking” zien gezegend waark doun. Leve de kaalslag.

Watter oeteindelk overblift  is de kollektebus van t  Anjerfonds.  Gain nood dus veur de bloaskapel- de ploatseleke  tenailverainen  en t twijstemmeg shantykoor.
t Minesterie kin opheven worren en Grode Geert krigt zien zin.

Wat zellen ale grutters en grootgrutters ien dit polderlaand din toch schatriek en overgelukkeg worren van aal dat vrijkommende geld.
Meschain dat ze der din wat voaker tou overgoan kinnen om t veurbeeld te volgen van onder andern de beheerder van t EEMSHOTEL IEN DELFZIEL.

……………………

Ien n klain zoaltje, dat hail mooi oetzigt geft op de Eems, hemmen wie noamelk  dit joar ien dat hotel zo ver al drijmoal n oavend genoten van meer- of juust hail wat minder bekende singer-songwriters.

1  Hans Theessink
2  Sarah Mac Dougall
3  Ben Prestage

Zunder oetzundern artiesten dij n optreden neerzet hebben doar wie as laifhebbers van ballads-blues- folk- en aalderhand muzikoale mengvorm, bie zatten te kwielen.
Dij artiesten deden heur kunsten op nuigen van t Eemshotel dat doar nuver
wat geld bie doan het, want de entree was bepoald nait om van te schrikken en de kovvie was boetendes ook nog top.
t Oetzicht op t oavendrood boven de Eems was sfeerverhogend, mor de  belangstellen veur de konserten van Sarah en Ben kon beter.

As ik op zo n schiere zummeroavend maank n haandjevol pebliek zit te kieken en te luustern noar n muzikant van wereldklasse, din geniet ik tot ien t daipste van mien genen. Mor tougelieks vuil ik tussendeur sums n voag gevuil van ploatsvervangende schoamte veur aal dij lu dij verstek goan loaten bie zowat.

Wie holden de aankondegens van nog meer optredens ien t Eemshotel ien de regiopers, goud ien de goaten.

Groutnis.