Moi,

k Bin al weer n week op stee ien n Daam.
Gusteroavend op fiets deur de dreven.
t Hogelaand is hail mooi mor nait te vergelieken mit Noorwegen.

Hail bovenaan op de Nordkapp van dat sprookjeslaand was t veur n dag of tien leden mor twij groaden. Nadde snij onderwegens en rendieren op weg.
n Ainzoam tiedloos landschop rolde onder auto deur; baargen, gletsjers, ies, snij, dook. n Roege, wonderschone wereld onder grille luchten.
De kolle wiend, de middernachtzun en de ontelboare wottervalen vertelden ons heur verhoal over aiveghaid en ik probaaierde doar wat van te begriepen. Mor aiveghaid in zien gehail is ja nait te bevatten….doarom heb k der toch wat mit, want ik mag groag speulen mit wat in wezen veur aiveg onbegriepelk blieven zel.

Dou auto ains nog nait oetpakt op oprit ston, snuusterde ik gaauw even deur t stoapeltje post en huil t Grunneger Tiedschrift Krodde te veurschien.
Nummer 114  joargang 29 al weer. t Blad is eerder al n moal beloond mit de
K. ter Loanpries en dat zegt nait aaltied alles, mor ien dit geval wel wàt.
Ik kwam miezulf ook tegen op bladziede 24 met n gedicht over AIVEGHAID

Aiveghaid ?

Is aiveghaid meschain n spoor
n Stroom – n stoadege rivier
n Vroag van woarom en van woar
Van hier noar doar – of doar noar hier?

Is t niks as kommen en weer goan
Niks as gedureg ain en aal
n Spul maank sterens zun en moan
n Troage zucht deur t hailaal?

Is aiveghaid meschain n roam
Zomor n rit of raais of run
Verlangen noar n beter noam
Of noar n ind of n begun?

Is aiveghaid meschain n vlucht
Is t n vrome wins of woan
Ik bin nait meer zo bot beducht
Moar – t blift veur mie n biesterboan 

Wat ik der enkeld mor mit zeggen wol: “Mien kiek op dij onbegriepelke aiveghaid is sund ons vekaansie ien t echte noorden weer wat verriekt.” 

Groutnis.