Oh volk van onder Zwolle en aan aander kaant van t IJsselmeer!
Wel van joe maint dat de Grunneger toal mainst boers- en lomp- en swoar is?
Ik zeg joe dat ons toal licht en luchteg- laif en kloar is.

n Verlaifde Grunneger kin sweven.  Nou ja, dat is meschain wat overdreven…..mor toch….gooit hai bieveurbeeld zien aarms as twij vleugels bezied, din komt hai mit gemak over ain nacht ies. Din komt hai, zunder n spoor achter te loaten over t zaachte zaand van Schier of Rottemerploat. Din lat hai op n kloare winterse morn nog gain voutstap achter op t widde loaken van vris valen snij.

Zo n Grunneger het gain reloatsie van swaiten en swougen.
Zo n Grunneger het n reloatsie van aaiden en plougen. Zien laifdeslaid kin zok meten mit t aaldermooiste- aalderfienste-  kuregste, zuide Fraanze Chancon d’Amour.

……………………………………….

Aailand ien de aiveghaid

De zee – de zun – de dag verguld
De knoopkes van n zummerklaid
De onschuld en t ongeduld
t Blode vel – verlegenhaid
De waarme wiend – t zaachte zaand
De drokke wereld – vot – zo wied
Genegenhaid – n speulde haand
Zuzooien deur vertroagde tied

Twijduustern staait om houk en wacht
De maiven – troage vleugelslag
Zai zaailen – wieken noar de nacht
Achter de dreum van dizze dag
Mit Venus boven t oavendrood
t Licht vergaait – verstaarft ien kleur
n Stip doar onderdeur – n boot
De grieze golven waigen heur

Dit uur van zuver parlamour
Dit aailand ien de aiveghaid
For ever – aaltied – veur toujours
Doar doe van waist – doar ik van wait
Dij stilte tussen slecht en goud
Dat Nowhereland veur vree en rust
Dij zandbaank tussen eb en vloud
Dat stee veur laifde en veur lust

De zee – de zun – de dag verguld
De knoopkes van n zummerklaid
De onschuld en t ongeduld
t Blode vel – verlegenhaid
De waarme wiend – t zaachte zaand
De drokke wereld – vot – zo wied
Genegenhaid – n speulse haand
Zuzooien deur vertroagde tied