< Terug noar overzicht van mien Dagbouk

Hoeskoamerkonsert en Goultheoater

Dagbouk RSS

Vrijdagoavend16 Dezember deur regen en wind aan de rit noar n vaailege hoeskoamerwoaraarns in Grunnen. 

Doar was t lekker waarm  – vaaileg en sfeervol verlicht  en t vuur in de heerd haar der
ook zin aan.
Op n laange toavel ston n keur aan drinken en drankjes en feesteleke schuddels mit hapkes.
Gasten kwammen ain noa de aander binnen en rond negen uur kon ik begunnen aan mien
eerste  halfuurtje mit lutje vertelsters – laidjes – ballades en gedichten.
Kerel wat n idee om mie veur zowat te vroagen ……en wat n idee om joen beste vrunden
veur zowat te nuigen. Echt n  gezellege boudel mouken wie der mitnkaander van.
k Heb der zulf ook aaibels van genoten want bewoners en gasten haren zichtboar en heurboar
wil van mien optreden en boetendes:
Tiedens pauzes was der de wereld te ontdekken veur de lekkere bekjes en deurgewinterde
dikkerdakkers.
Jammiejammie!  En din aal dij drankjes….mor ja…….Popke Nathaals mos nog rieden…mor
thoes het hai der nog aine op nomen …..pardon………twij……Proost lu…tot aander moal!

 

 

Jan knollemoa zien Goultheoatertje in Spiek was aanderdoags (Zotterdagoavend 17 dezember)
oardeg goud bezet.
Om kwart over aacht mos ik mit t wotter veur de dokter. Drij blokjes van n haalf uur.
En zo as dat wil as t mooi gaait: Oavend was ook mor zo weer veurbie.
Jan haar t noa tied vot al weer over 2012 en wat mie aanbelangt: Ik kom groag nog weer n
moal oet want dat lutje Carré kins die aigelks nait veurstellen as je t nait zain hemmen.
Sfeer en sfeer en sfeer en ales in t klain wat grode Carré in t groot het. 
As Jan oet tied komt gaait zien theoatertje noar Madurodam…..let op mien woorden.

Jan het zien theoatertje inbaauwd in t “Goul” van zien boerenschuur.
“Goul” betaikent: roemte aan binnenkaant van de zoelen, doar vrouger t koren of t heu
optast wer. (Kiek mor in Ter Loan blz . 273)

Scheuvelloper, zanger, schriever, entertainer, fulmer, doezendbainder Free Westerhoff het de veurstellen digitoal opnomen. 
Vanzulf dat ik brandnijschiereg bin noar t resultoat mor ik mout nog even geduld hemmen.

Een reactie op “Hoeskoamerkonsert en Goultheoater”

  • Margriet Vernooij-Eisses schreef:

    Beste Hans, erg leuk die Grunniger liedjes,het boekje met teksten heb ik wel nodig hoor, graag wil ik mijn broertje in Veendam verrassen met de cd. Ik denk dat hij het zo wel verstaat, erg leuk. Fijne Feestdagen gewenst en een goed 2012, groeten van Margriet.

Zet n reaktie op stee

Velden mit n * binnen verplicht

< Terug noar overzicht van mien Dagbouk