t Spaigelploatje doar ik t al eerder ais n moal over haar komter aan.

Ofgelopen moanden isder bie zetten duchteg aan waarkt om t  oeterliek veur haalf november kloar te kriegen en as k mie nait staark misheb din gaait dat lukken.

Bie Bert Ridderbos binnen dit joar ien drij sessies ien totoal 23 nummers opnomen. Doar binnen der 16 van op n riegje zet en oeteindelk op de master terecht komen.
Dij “master’ glee ofgelopen zotterdag bie mie deur t  klepgat en dat was mie n vreugde. k Heb hom vot beluusterd en begunde aal meer te glimmen en te glundern. Dou k hom aanderdoags nog weer twijmoal aanheurd haar wer dat nait  aans.
t Wordt n biezunder ploatje en dat is ook zeker te danken aan Bert Ridderbos. Bert het n poar goie oren aan t heufd en veul gevuil veur woar n muzikant en zanger mit zien materioal noar tou wil.  Boetendes het hai n pazende muzikoale biedroage leverd aan 9 van de 16 nummers.
(Bas – gitaar – accordeon) k Bin der gloepens wies mit.

Ankom vrijdag gaait t  haile verhoal wieder mit n bezuik aan VMI ien Stad Grunnen. Doar goan we proaten en kieken wat veur klaaier dat mien vannijs geboren kiend aanmeten krigt. M.a.w : “Tekstboukje mit of zunder foto’s der bie, enz.,enz.”
Gelukkeg kin ik t  haile ontwaarp mit volste vertraauw oetbesteden aan dochter Vita, (wordt mooi) Wat n genot en gemak.

As dat ook aaltmoal regeld is gaait t ploatje noar de febriek. De master wordt doar vermenegvuldigd mit 500 en din is t nog mor even dat ik t haile spultje ien hoes krieg.
Intied heb k nog prakkesoatsies genogt.

Woar en wenneer hol ik de presentoatsie ?
Wel kriegen der aalmoal n nuigen?
Wenneer goan de persberichten der oet ?
Wel krigter n ploatje vergees en wel nait ?
Wel laang ik de eerste ?
Heb k der dammee wel genogt?
Heb k der nait te veul?
Wordt e wel draaid bie Noord?
(En nog 27 vroagen meer, t is mor goud dat ik op pensioun bin din kin ik t wachten mie doar aalmoal drok over te moaken. Mor sums dink ik wel ais: “Vizzen is ook n schiere hobby….minder zenen …minder stress”

Hol t mor ien de goaten…t komt aal dichterbie en ik zel mit regelmoat even waiten loaten hou ofter veurstaait.

Groutnis