< Terug noar overzicht van mien Dagbouk

Wadwerderweg

Dagbouk RSS

EVEN VEUR ALES AAN:
OKTOBER/NOVEMBER KOMT DER N SPAIGELPLOAT OET MIT
VATTIEN OF ZESTIEN NUMMERS  (MIT O.A WADWERDERWEG)
MOR VEUR T GEVAAL DAT IE  T ZOLAANG NAIT WACHTEN KINNEN:
KLIK OP “LUUSTERN”  

                              ………………………

WADWERDERWEG

Ik road joe aan om t ambt van kommesoares van de keunegin nait te onderschatten. Denk mor nait dat t bieveurbeeld Henk Vonhof gegeven was om moar willekeureg op elke aanboden stoul ploats te nemen. Doar wer nait aaltied bie stil stoan en de gevolgen waren sums bedinkelk.
Ien t Provinciehoes was dat n beste zet leden gelukkeg beter regeld.
Der was dou ien dat gebaauw wat te doun mit amateurkunsten….ik der ook maank mit mien Grunneger verskes. Ons oldste dochter Vita was nog mor drij joar en zo zaten wie doar te wachten tot ik ook aan beurt was.

Stel joe veur- op n riegje – lutje Vita, Jantina en ikke, op n joekel van n soort haafronde ledern baank mit zat roemte veur nog n dikke kerel meer……….
en dou kwam Henk Vonhof der aan. Vita zag hom doalek en heur oogkes volgden hom stap veur stap.
En joa heur….de kommesoares van de keunegin stìnde wat en drukde dou zien gewichtege achterìnne daip ien t leder van de baank, stoef noast ons lutje wicht en hai nikde heur minzoam tou. En ik zel nooit dij oetdrukken op heur snoetje vergeten dou zai zok noar heur moeke toudraaide mit vroagende ogen as schuddeltjes zo groot.
Jantina huil wiesvinger veur de lippen…..sshhhht mien kiend – zeg asjeblieft mor niks, ik leg die t loater wel oet.

Mor wat n oarege,- vrundelke man ….dij Henk Vonhof.

Van Hans Alders dij noa hom kwam, kin ik dat nait zeggen omreden ik Hans Alders aigelks nait kin. Ik von Hans Alders wel n moudege man omdat hai der doudestieds veur kozen het om aan de Wadwerderweg te goan wonen.
Meschain was t gewoon onkunde van hom. Men het hom bliekboar nooit woarschaauwd.
Elkenain ien Grunnen wait ja wel: “”Wadwerderweg, de griezels sjaauwen die ja over de graauwel, onnuur, wat n gevoarleke weg is dij Wadwerderweg !

t Was n mooie zundagmorn
Niks gain swoareghaid of zurgen
Nog gain moesje op de Wadwerderweg
t Was nog vroug – mor al waarm
Hail aan kaant ien de baarm
Zat n slak – zunder hoesje – wat n pech
Hai was hailendaal oet t stuur
Mor hai ging veur t oaventuur
En hai kraabde en hai schraabde zien verstaand 
Nam n roam – hail sekuur
Van n meter ien t uur
Want zien Hoesje dochde – was aan aanderkaant
Mor wel kwam doar om de bocht
Kiek es aan – dat haar k wel docht
Dat was Wietse mit zien fietse aan de haand
Van zien vaste stek ien kroug
Haildaal lopendes noar t loug
Mit de piepen vol en mit n lekke baand
Haar dij slak op zien pad
Dou zien hoesje nog had
Din was t dou – waik wel zeker – kepot
Nou ging t net nog mor goud
Dat wil zeggen – ain vout
Kneep hom t achterste ìndje – aan mot

Ie doun der goud aan om te heuren wak joe zeg
Kom nooit op zundag op de Wadwerderweg!

t Slakje nog nait op stee
Haar intied gain idee
Was zokzulf nog mor amper gewoar
Keek nait rechts – keek nait links
Kroop gestoadeg hail slinks
Aal mor deur – nait bewust van gevoar
Wel kwam doar om de bocht
Heregek – dat haar k wel docht
Mit n noodgaang – gewoon idioot
Dat was Jaan – van taan Jo
Ien zien ol Deux Cheveaux
Van t front  – veur de daaiern – ien nood
Net geliek doar Jaan gaait
Net geliek doar Jaan staait
Vlaigen koien en peerden deur t droad
Kriegen kikkers n schrik
Valen houder van t rik
Doun zol heerns zokzulf van de groat
Dou hai t slakje vernam
Gooide Jaan aal zien gram
En gewicht mit geweld op de rem
Kwam tot stilstand ien dook
Stank van rubber en smook
t Aarme daaier – zat net nog nait klem

Ien doun der goud aan om te heuren wak joe zeg
Kom nooit op zundag op de Wadwerderweg!

En Jaan belde mobiel
G.G.D. van Delfziel
Hurre wat heb ik hier weer ommaans
Ligt n daaier hierzood
Is op staaven noa dood
Kom vot hier hin mit joen ambulaans
Aaldernoarst – waist nait van
Dou joen swaailicht mor aan
Moien dokter – Aju parreplu
t Aarme daaier krampeert
Moak hom reannimeerd
Hier op aan mit joen tatu – tatu
Geert van de G.G.D
Zee gain joa – zee gain nee
Belde votdoalk de brandweer van Beem
Meschain waiten ie t aal
Zo en zo is t gevaal
Geef t mor deur aan de plietsie van Steem
Zo kwam boudel aan loop
t Wer n iezelke soap
t Hogelaand ston verstomd en versteld
Van t geluud – van de gaalm
Van de dampen – de kwaalm
Van t lewaai van t motories geweld

Ie doun der goud aan om te heuren wak joe zeg
Kom nooit op zundag op de Wadwerderweg!

Nog mor naauw negen uur
En n drokte – onnuur
n Rebulie – en net geliek woar
Elkenain bie t pad
Tussen t Raitdaip en t Wad
En t Westerwiedwerdermoar
En aan t ìnd van t verhoal
Ston dat aaltmoal aingoal
Ien n rieg achter Jaan van taan Jo
Mor t slakje docht: Schiet
k  Heb t vandoag nait aan tied
Gain belang bie n occasionshow
En hai naaide der oet
Kroop maank roegte en roet
En maank diezel aan raand van slootswaal
Was gelukkeg en blied
Was verswonnen en kwiet
t Is n hoast onbegriepelk gevaal 
Wel kwam dou op t appèl
Zunder rem – zunder bel
Berend Beukemoa op zien kombaain
Juig heur aal op n bult
Zee potdorie – verduld
k Haar joe aal mitnaander – nait zain!

Ien doun der goud aan om te heuren wak joe zeg
Kom nooit op zundag op de Wadwerderweg!
Ie doun der goud aan om te heuren wak joe zeg
Kom nooit op zundag op de Wadwerderweg!

Nait doun!

…………………………………………………………

Klik op “LUUSTERN”” en ie vienen WADWERDERWEG  middenmaank nog
 25 aander nummers, dij ie boetendes ook nog aalmoal downloaden kinnen.

As ie nog meer teksten lezen willen klik ook op “SNUUSTERN”
Vernuver joe der mit!

Groutnis

2 reacties op “Wadwerderweg”

  • lenie thart schreef:

    Wat een geweldig verske over de slak.

  • lenie thart schreef:

    Geweldig ik wil graag alles bestellen. vooral de Wadwerderweg. Mijn adres is Dallingeweersterweg 8
    9947 TA Termunten. tel 0651587774.
    Moi Lenie

Zet n reaktie op stee

Velden mit n * binnen verplicht

< Terug noar overzicht van mien Dagbouk