2 oktober/Vrienden van RTV-Noord
Dagbouk RSSVRIENDEN VAN RTV- NOORD binnen zundag 2 oktober te gast in de Vicarie van
Imca Marina. Imca is din heur gastvrouw en dat betaikent o.a. dat de inwendege
mins doar din zeker woar wel aan zien trekken kommen zel.
De vrienden van Noord binnen tougelieks ook nog te gast bie t radioprogrammma:
“NOORDMANNEN” (Okkie en Alex) dat doar tussen 09:00 en 11:00 u live 0etzonden wordt.
Veur IMCA MARINA….DE STROATKLINKERS….en HANS VAN DER LIJKE is der roemte
om zok onder bedrieven deur heuren te loaten…..van dij gevolgen dat dit verhoal op mien
agenda nait ontbreken mag.
Zundag 18 September/Minitheoater/Jan Knollemoa
Dagbouk RSSZundag 18 september zel t din eindelk weden….. in Spiek wordt din
noamelk Jan knollemoa zien minitheoater inzegend….nait deur de paus
(dij kon t nait wachten) mor wel deur Jan zulf en ook vanzulf deur en
veur vrunden, femilie, ex kollegoas, bekenden en in aals gevaal aalmoal
laifhebbers van wat der mit de ogen en oren gericht op n podium te beleven is.
k Heb der al eerder n stukje aan woagd mor mit n dikke twij moand is t din
eindelk zo wied. Der is meziek….Jan wil zulf ook wat doun….schriever/dichter
Henk Puister is nuigd om wat veur te droagen en IK ZEE DE GEK woagt zok der
ook aan.
“As wie t had hemmen goan we aan de borrel””, zee Jan (En doar hol ik hom aan)
t Is besloten vanzulf, mor k bin der zo aaibels wies mit da k ook nuigd bin, dat ik t
doarom toch op mien agenda zet heb. Ie zellen der in Septembermoand van mie
wis nog wel meer van heuren.
Schemeroavendkonsert en aander ditten en datten
Dagbouk RSS
Moi,
Al weer 19 juni…..tied daldert sums en din mit windkracht tien deur t doagelks leven.
t Is al weer n dikke vattien doagen heer da k veur t lest muzikoal van mie heuren luit.
Dat was in Troapel, doar Klaas Spekken in zien toen sums n openluchttheoater het,
en doar hai t bliekboar ook veur wat betreft de boetentemperatuur veur t zeggen het
want t was doar in t mooie Westerwolde op vaier juni n dreuge en schiere
veurjoarsoavend.
Klaas zien toen is roem en het veul sfeer. Onder n oafdak van poalen en douk
stonden riegen klapstoultjes dij tegen negen uur s oavends grotendails
innomen werren deur n aandachteg pebliek. Klaas zien schemeroavendkonserten
roaken onderhand bie n duchteg aantal laifhebbers bekend en hailwel woardeerd.
Dat is o.a omreden dat organisoatsie (doar meerdere personen bie betrokken binnen)
in goie handen is. Veur t overege is Klaas n entertainer eerste klas, n goie presentator
en aal met aal n gastheer dij wait woar zien pebliek veur komt……………………………
(Mooie laidjes/aigen waark/perfekte vertoalens/schiere begelaaiders enz.)
Op dij lije veurjoarsoavend zotterdag vaier juni was ik zien muzikoale gast en hemmen
wie mekoar oafwisseld. Elk mit ons aigen repertoir en ik heb der van genoten….
Wat mie betreft: “Veur herhoaling vatboar!”
Van t optreden op dizze mooie veurjoarssoavend binnen deur Free Westerhoff n aantal regisstroatsies
moakt. Free is n doezendbaainder en dat betaikent dat hai o.a aktief is as zanger van
n Grunnegstoaleg kwartet genoamd Daip river’
Free schrift kurte verhoalen en het deur de joaren hin zien sporen verdaind in de grode ritten op scheuvelies
(in binnen- en boetenlaand)
Boetendes moakt hai professionele registroatsies van verschillende evenementen. Op t internet- en ook op zien
webstee binnen doar knappe veurbeelden van te vinden www.freewesterhoff.nl
(Foto: Martin Smit)
……………………………………
Hail aanswat.
Op mien site is ” LUUSTERN ” aanvuld mit 20 laidjes. Dat betaikent dat t totoal aan te
beluustern en te downloaden laidjes en fiebeldekwinten, sunt n week oetbraaid is tot
46 stuks. Ik wens joe sukses bie t downloaden en vanzulf veul groates luusterplezaaier.
Wieder is ook ” TINIE S HOEK ” oetbraaid mit t verslag van n raais deur
Laplaand/Zweden zoas wie dat eerverleden joar oaventuurd hemmen.
Dat verslag bestaait oet twinteg gedichten dij deur mie schreven binnen,
veuraal noar aanlaaiden van inspirerend fotomaterioal van Tinie.
Dat fotomaterioal is doar vanzulf ook te bewondern.
“t Ontwaarp- de oetvoering en t onderhold van de site binnen in handen
van de programmeurs- en designers van “Studio Oudeschip” René Diekstra
en Vita van der Lijke.
Dat mog onderhand ook wel ais even zegd wezen.
Groutnis……. en vernuvert joe der mit
Hans van der Lijke
Vriendenclub Omlandia-Ten Boer
Dagbouk RSS4 November – optreden veur de Vriendenclub
Voetbalvereniging Omlandia in Ten Boer in de
kantine aan de Sportlaan.
Vanzulf dat dizze oavend allind veur de leden
van de vriendenclub is……mor ik wait dat n
oavend mit ol veteroanen bar gezelleg wezen kin.
Op zotterdag 10 dezember/Tramwerkplaats
Dagbouk RSSOp zotterdg 10 dezember treedt Hans op in de Tramwaarkploats in Winschoot veur de leden
van de GRAAF ADOLFLOGE
t Optreden is besloten en zel duren van omtrint 20:00 u. tot 20:30 u. 5F
21 juni Kwekerij Jacobs/Vriescheloo
Dagbouk RSS21 juni zwaarft Hans (’s oavends) op de laangste
dag van t joar deur de schitternde toen van
kwekerij Jacobs in Vraiskelo – 5e Dalweg 4
om doar zien laidjes – gedichten en vertelsters
heuren te loaten
info@kwekerijjacobs.nl
0597 54 1543
——-
n Schiere toen in Vraiskeloo
n Lutje Hof van Heden
Doar maag ik op de laangste dag
Wel weden – mie vertreden
———–
Grunningstoalege troubadour/schriever/dichter
Hans van der Lijke zingt en verhoalt doar op
21 JUNI
van zien belevenissen van alledag
Hans was in 2009 n moand te gast in ain van de
grootste toenen van Europa (Laplaand-Zweden)
en hai het doar as deurgewinterd toenlaifhebber
twinteg gedichten over schreven dij onder
t hoofdstuk “Snuustern” eerdoags op dizze webstee
ploatst worren zellen.
Kiek op dizze webstee ook even noar “Snuustern”
Doar is onder de titel: “Ons stee” veul te genieten
van wat mit toentjederij te doun het .
———
Laplaand – Zweden – 2009
Febus en Flora
Alles hier is as verweven
Tot n geureg – fleureg klaid
Tot n overdoad aan leven
In dit laand dat Laplaand hait
Zoadjes mitwaaid – zomor oetzaaid
Tussen vlinten – tussen grint
Zunder teugels – mit op vleugels
Van n rusteloze wind
L uchteg oetstreud – loater oetgruid
Tot n kleureg slingernd lint
In de baarms en langs de beekjes
Want as leste snij verswint
Din komt as vanzulf de regen
Komt t veurjoar mit n sprint
Net geliek woar – aalderwegens
Daddelt din t lentekind
———
Wat zel ik nog meer begeren?
Febus stroalt hier nacht en dag
Spaigelt zok in vrizze meren
Flora vangt zien waarme lach
16 April / Cult.centrum “De Richel” in Nije Pekel”
Dagbouk RSSOp 16 april speul ik veur de wat oldere medemins in Nije Pekel
Dat is tussen twij en vief uur nommedags in Cultureel centrum
“De Richel” As ie doar meer van waiten willen bel: 0597 45348
Vogelvlucht
Dagbouk RSSIe hemmen ofgelopen tied nait te veul meer van mie vernomen, doar wil ik even wat aan doun.
t Het niks mit meziek te moaken mor wie stonden in feberwoarie nog even op de laange latten ( in Tsjechie) (Niks broken – aal goud) mor t verkloart veur n dail mien laangere ofwezeghaid op dit blog.
Nou nog even over meziek en mien ankommende muzikoale fiebeldekwinten van dizze moand.
Begun dizze moand was ik even bie Jan Knollemoa op veziede. (Veur wel hom nait kin;…..Jan is al sikkom antiek….hai is nog van veur de oorlog (april 1940)
Dat betaikent nait dat hai gain road wait mit zien tied. Dou hai veur tien joar terug ofswaaide as theoaterdirekteur van “De Meulenbaarg” in Delfziel, het hai n boerderij kocht in Spiek.
Doar het hai zok onder aandern zulf omschould tot pottebakker en doar is in zien pand n roemte veur inricht….. aan roemte gain gebrek. Dat is ain.
Zotterdagoavend 4 juni bie Klaas Spekken in Troapel
Dagbouk RSSDut mie deugd da ‘k nuigd bin as Klaas zien gast bie n zogenoamd “Schemeroavend Concert”
Klaas Spekken het zowat al eerder omhaans had en ik bin vanzulf slim nijschiereg hou dat
in zien waark gaait. k Zel in aals geval n lije zummeroavend regeln want t konsert zel wezen in Klaas zien toen (Sellingerstroat 7 in Troapel) Wat n idee!!!
Wie begunnen rond 21.00 As ie der meer van waiten willen bel Klaas:0599 584325 of kiek op
info@klaasspekken.nl t Wordt mooi!
Moandag 7 meert bie Radio Westerwolde
Dagbouk RSSMoandag 7 meert is Hans tussen vief en zes uur uur ’s noamirregs te gast
bie Radio Westerwolde in Vlagtwedde, in t wekelekse programmoa van Wilma en Herman. Aaltied weer leuk om veur n (serieuze) lokoale zender wat heuren te loaten.
