Nije spaigelploat ?
Dagbouk RSSOp dinsdag 29 novemmer zel der in aals geval weer n opnoamesessie wezen
in de studio van Bert Ridderbos. t Is bedoulen datter in 2012 nog n aantal sessies
achteraan pland worren. Dat doar oeteindelk spaigelploatjes van kommen zol mooi wezen.
Hou laank of ain en aander duren gaait is nog niks van bekend.
Aan matterioal zel t nait liggen, planken boegen deur.
Nij bouk van Aafke Steenhuis
Dagbouk RSSOp vrijdagmirreg 25 novemmer wordt der in t Eemshotel in Delfziel n noagelnij bouk deupt
dat zien lof zingt over de Eems en ales wat mit dat wotter van doun het.
Schriester Aafke Steenhuis is doar vanzulf ook bie aanwezeg en troubadour
Hans van der Lijke zel de deup muzikoal omliesten mit laidjes over
zun-zee-zolt-slik-sliek-wind en wolken.
t Gebeuren begunt omtrint om 14.30 u.
Dag van de mantelzorg
Dagbouk RSSOp tien Novemmer is t weer “Dag van de Mantelzorg.”
In gebouw “De Schakel”, in Bedum is der doarom op dij dag wat te doun.
Doar worren vanoaf 14.30 u de Beemster mantelzurgers in t zunnetje zet.
Hans van der Lijke bringt doar din n programmoa van drij moal n haalf uur.
“De mens in de kunst”
Dagbouk RSSBie de kunstenoars van de Graanrepubliek (Oude Remise – Oudezijl 1 – Bad Nieuweschans)
wordt deur Bé Buining op ankom zundag 6 novemmer heur nije expositie opend.
Aanvang 15.00 u Het themoa van de expositie is: “De mens in de kunst.”
Hans van der Lijke zel de opening muzikoal omliesten”.
Nedersaksisch Streektoalfestival/Emmen
Dagbouk RSSOp zotterdag 3 meert 2012 dut Hans mit aan t Nedersaksisch Streektoalfestival
(Reurfestival) in biebeltaik Noorderplein 101 Emmen.
Hans is doar twijmoal twinneg menuten aan beurt
Op twijde verdaipen in t Leeskefee van 13.00 – 13.20
Op begoane grond van…………………… 15.20 – 15.40
Hol veur meer berichten www.reur-festival.nl in de
goaten.
Knollemoa
Dagbouk RSS
Moi,
Oafgelopen zundag 18 september gingen bie Jan Knollemoa ien Spiek
de gerdienen open en t was der geliek groot feest.
t Wazzen noamelk gain deurdeweekse gerdientjes mor echt velouren theoaterdouk.
Jan het t vak van theoaterdirekteur al tien joar achter zok liggen mor zien lier wil nog nait recht
aan de wilgen.
t Lutje theoatertje dat hai oafgelopen joaren mit wat hulp kloar kregen het, opende zien deuren mit
n swingend jazzy combo….tussendeur nog n aantal ras muzikanten…….en mit dichter/schriever en
veurdrachtskunstenoar Henk Puister en mit de troubadour dij dit stukje tekst ommaans het.
In t levensechte theoaterzoaltje waren ale viefteg schiere zitploatsen bezet en genoten minsen van
ales wat doar in t verlengde van Jan zien unieke initiatief te beleven vil.
Mooi om t aal mit te moaken en al hailemoal om ook op dat podium n biedroage levern te kinnen.
Baanderdeuren van Jan zien boerenheerd stonnen wiedwoagen open en lopend deur de veurmoalege
stallen kwam ik oet in de foyer dij zien noam as zodoaneg inderdoad dik verdaint.
Jas oflevern op stee, krekt zo as t heurt – nog even noar de noagelnije en blinkende toiletten om de
zenen der oet te miegen en din weerom deur de foyer noar t artiestenverblief. Doar komt (reken ik)
nog tapijt op vlouer. Veur de rest zag t der nadjes oet.
Op n schaarm kon men doar klip en kloar volgen wat der op t podium op t zulfde moment te doun was.
Jan wait boetendes wat n artiest toukomt. Koelkaast mit verfrizzende inhold nuigde ons deurlopend.
Knollemoa gaait veur dit joar nog t ain en aander programmeren en doar binnen veul lokoale en
regionoale laifhebbers van meziek – klainkunst en streektoal slim wies mit. Wat miezulf aangaait….
Dizze man staait op t schoefie om op n zotterdagoavend of n zundagmirreg op de planken te stoan
van dat lutje Spiekster Carré.
Groutnis.
Tolhuistuin/Amsterdam Noord
Dagbouk RSS25 augustus 2011
Haalve moand juli en eerste week augustus hemmen wie weer op roakeldais
west deur Scandinavie.
Wie mouken dagtochten vanoet t schitternde Sognedal noar ale windstreken
van wonderlaand Noorwegen.
Berichten over wat der ondertied in Oslo veurvalen was …….. nait te vatten!
Ien ale kerken lagen bloumen…stonnen brandende keerskes….
Op t sentroale plaain ien Sognedal: Honderd vaaierkaante meter mit knuffels…
koartjes… braiven…bloumen…bloumen…bloumen……….
t Is ja onbegriepelk dat zowat mor zo gebeuren kin ien zo’n stainriek en
prachteg laand. n Laand doar de netuur zok deur minsen nog laange nait
ienpakken lat.
t Laandschop overstemt mien gedachten…. t moakt stil…en weemoudeg sums
omreden dat ain ding doar veuraal hail dudelk wordt: “Wie hemmen n wereld as
aarfgoud mitkregen….zo mooi ….zo mooi….. nait te zeggen zo mooi.”
Omreden dat ik nou ainmoal geren schrieven mag, over mooi (en maal), haar k
pen en pepier mitnomen. Dat was ook mor goud want der binnen doar tien
gedichten over dij sprookjeswereld te veurschien kommen.
As Tinie heur giga aantal foto ’s sorteerd het, zelwe op dit stee dij gedichten
ain noa d’ aander stoareg aan ploatsen kinnen.
( Mit heur haile biezundere foto ’s as illustroatsies)
Twijde week ien Noorwegen ston der n grappege nuigen op de mail doar ik
oeteindelk hail dankboar op iengoan kon.
Van dij gevolgen ston ik zundag vattien augustus op n buhne ien
Amsterdam-Noord.
Meschain dat t gebeuren ien Oslo der tou biedroagen het, dat ien Amsterdam deur
lu van “De Tolhuistuin” n intercultureel programmoa soamensteld wer mit n hail
biezundere opzet.
t Gehail kwam aan loop onder de noam: “Het lied dat je meenam.”
Zes braivenschrievers, geboren ien…. Iran – Egypte – Engelaand – Marokko –
Surinoame en Grunnen, leesden elk n braif veur dij zai schreven haren aan n persoon
ien heur geboortelaand. Ien dij braiven wer t onderschaaid oetstukt tussen t laand van
herkomst en t nije voaderlaand. Ien aal dij ( hail verschillende) braiven zat veul
humor mor ook daipe ernst – pien en emotie en t vil nait aaltied tou om ogen der
dreug bie te holden.
Schrievers haren ook elk n laid aangeven doar heur gevuil veur t geboortelaand
tot ien oetdrukken kwam. Aafke Steenhuis (geboren op t Hoogelaand/Grunnen) haar
kozen veur “Mien Hoogelaand” van Ede Stoal. t Was n eervolle opdracht om dit schitternd
laid op mien aigen wieze zo goud meugelk heuren te loaten (Mit n nummer van aigen haand
der bie tou)
Sikkom de helft van Amsterdammers is van allochtone oafkomst…. en op vattien augustus 2011
hemmen wie weer ais beleven kinnen wat ons as minsen oet aal dijverschillende horns en houken
van de wereld bindt. t Was n dag om nait gaauw te vergeten.
Groutnis………………………………………………………………………………….Hans van der Lijke
Gemengd zangkoor-Oskert
Dagbouk RSSOp 29 oktober is der duchteg wat te doun ien Hervurmde kerk van Oskert
Ter gelegenhaid van t ploatselke, jubilerende gemengde Oskerder koor, is der n
programmoa soamensteld doar wieder ook nog aan mitwaarken:
De Kaanster Vlinthoppers
Het Waarffums mannenkoor
En Hans van der Lijke
t Spul begunt om 19.45 u en zel omtrint deurgoan tot 22.30
t Wordt n schiere oavend!
Bennewolle (Het leukste durp van Grunnen)
Dagbouk RSSMoandag 29 augustus is der ien Bellingwolde (Bennewolle)
tussen 11:00 en 17.00 u. hail wat te beleven ien dat mooi durp.
t Gedounte op dij dag dragt de noam: “Het leukste durp van Grunnen”
Ik bin nuigd om doar op n noader te bepoalen stee mien laidjes
heuren te loaten.
As ex-ienwoonder van gemainte Bellingwedde kon ik t vanzulf zomor nait aan
mie veurbie goan loaten.
As ie der meer van waiten willen hol din ankommende weken de streekbloaden
goud ien de goaten. t Kin wel drok worden en RTV Noord, heb k begrepen, zel der
aingoal bie aanwezeg weden.
t Liekt mie tou dat ie dat ast even kin nait mizzen magen.
Tolhuistuin/Amsterdam-Noord
Dagbouk RSSZundag vattien augustus n kurt optreden ien “De Tolhuistuin” (Amsterdam-Noord)
t Spul begunt om drij uur en draait onder de noam “HET LIED DAT JE MEE NAM”
Op nuigen van n zestal mainst boetenlaandse schrievers (Dij ien ons land onderdak
vonden hemmen) vertolken n aantal artiesten oet heur laand van herkomst
een laid dat zai as t woare mitnomen hemmen en dat veur heur van veul belang is.
Op verzuik van schriefster Aafke Steenhuis (Dij vanoet t Hoogelaand doudestieds
emigreerde noar Amsterdam, zingt en speult Hans op zien aigen wieze, ondermeer
t bekende laid van Ede Stoal: “”Mien Hoogelaand”
t Kin mit aal dij boetenlaandse laidjes n hail biezundere en kleurrieke mirreg worden.
Kiek veur meer informoatsie op www.tolhuistuin.nl
