Wadwerderweg

‘t Waas ‘n mooie zundagmörn.
Niks gain swoareghaid of zörgen.
Nog gain moeske op de Wadwerderweg.
‘t Was nog vroug – mor al waarm.
Hail aan kaant in de baarm
zat ’n slak zunder hoeske – wat ’n pech!
Hai was hailendaal oet ’t stuur.
Mor hai ging veur ’t oaventuur.
En hai kraabde en hai schraabde zien verstaand.
Nam ’n roam – hail sekuur van ‘n meter in ’t uur
want zien hoeske dochde – waas an aanderkaant.

Mor wel kwam doar om de bocht?
Kiek es aan– dat haar ‘k wel docht.
Dat was Wietse mit zien fietse an de haand.
Van zien zien vaste stek in kroug
haildaal lopendes noar t loug
mit de piepen vol en mit ‘n lekke baand.
Haar dij slak op zien pad
dou zien hoeske nog had
den waas ’t dou waik wel zeker- kepot!
Nou ging ‘t net nog mor goud.
Dat wil zeggen – ain vout –
kneep hom ‘t achterste ìndje aan mot!

‘t Slakje nog nait op stee –
haar in tied gain idee
waas zokzulf nog mor amper gewoar.
Keek nait rechts – keek nait links –
kroop gestoadeg hail slinks
aal mor deur – nait bewust van gevoar.
Wel kwam doar om de bocht?  
Here- dat haar ‘k wel docht.
Mit ’n noodgaang – gewoon idioot.
Dat was Jaan – van Tan Jo
in zien ol Deux Cheveau
van het front – veur de daaiern- in nood!

Net geliek doar Jaan gaait –
net geliek doar Jaan staait –
vlaigen koien en peerden deur ’t droat.
Kriegen kikkers ’n schrik.
Valen hounder van ’t rik…
Doun zolt heerns zokzulf van de groat.
Dou hai ‘t slakje vernam
gooide Jaan aal zien gram
en gewicht mit geweld op de rem.
Kwam tot stilstand in dook
stank van rubber en smook
‘t aarme daaier zat net nog nait klem!

(Ie doun der goud aan om te heuren wa ‘k joe zeg…
Kom nooit op zundag op de Wadwerderweg….!)

Dus-  Jaan belde mobiel
GGD van Delfziel.
Hurre wat heb ik hier weer ommaans?!
Ligt ‘n daaier hierzood.
Is op staarven noa dood.
Kom vot hier hìn- mit joen ambulaans!
Aaldernoarst waist nait vaan.
Dou joen swaailicht mooi aan.
Moin dokter – aju parreplu!
‘t Aarme daaier krampeert!
Moak hom reannimeerd!
Hier op aan mit joen tatu-tatu !

Geert van de GGD
zee gain joa– zee gain nee.
Belde votdoalk de brandweer van Beem!
Meschain waiten ie ’t aal!
Zo en zo is ‘t gevaal.
Geef ‘t mor deur aan de plietsie van Steem!
Zo kwam boudel aan loop.
‘t Wuir ‘n iezelke soap!
’t Hogelaand ston verstomd en versteld.
Van ’t geluud – van de gaalm.
Van de dampen – de kwaalm.
Van’t lewaai van’t motories geweld.

(Ie doun der goud aan om te heuren wa’k joe zeg…
Kom nooit op zundag  op de Wadwerderweg…!)

Nog mor naauw negen uur
en ’n drokte – onnuur!
’n Rebulie – en net geliek woar –
elkenaine bie ‘t Pad
tussen ‘t Raitdaip en ’t Wad
en het Westerwiedwerdermoar!
En aan ‘t ìnd van ‘t verhoal
ston dat aaltmoal aingoal
in ‘n rieg achter Jaan van Taan Jo.
Mor het slakje docht – Schiet
‘k heb‘t vandoag nait aan tied.
Gain belang bie ’n occasionshow!

En hai naaide der oet –
kroop maank roegte en roet
en maank diezel aan raand van slootswaal.
Waas gelukkeg en blied.
Waas verswonnen en kwiet.
‘t Is ‘n knap onbegriepelk gevaal!
Wel kwam dou op’t appèl –
zunder rem – zunder bel?
Berend Beukemoa op zien combine.
Juig heur aal op n bult –  
zee potdorie verduld –
‘k haar joe aal mitnaander nait zain.

(Ie doun der goud aan om te heuren wa’k joe zeg…
Kom nooit op zundag op de  Wadwerderweg…
Nait doun…!)