’t Gasfebriek.

Tied…..midden van de joaren zeuventeg.
Ploats….Stad Grunnen – In en rond de gebaauwen aan de Bloemsingel – het terrain van het g.g.g., oftewel…..
Het Gemeentelijk gasbedrijf Groningen– of beter nog– zo as dou in’t
aalgemain zegd wour …..’t Gasfebriek.
Zo ’n noam as van ‘t Gasfebriek, blift n generoatsie laang hangen mor midden joaren zeuventeg wuir doar op‘t gasfebriek onderhand al meer as tien joar gain cokes meer omzet in stadsgas.

Het G.G.G. verzurgde in dij joaren de distributie van ‘t aardgas in Stad Grunnen en ‘t Westerketaaier en dat leverde vortdoalek direkte waarkgelegenhaid aan omtrint honderdviefteg medewaarkers doar ik as kredietbewoaker en dossierörmer aacht joar laang ain van waas.

In dit schrift vroag ik mie oaf – ofdat het noodlot wel ‘n kans kregen haar as de sfeer op’t bedrief beter west waas….
En wordt sfeer nait in hoge moate mit bepoald deur watter zegd wordt en veuraal deur de menaaier zo as dat ‘t zegd wordt ???

Mien vertelster gaait over wat twij waarknemers van de boetendainst doar overkwam. Dat heb ik opschreven noar eer en gewaiten – Zo as ik – mor ook aandern doar tegen aankeken hemmen.
Dat ien aals geval– en vanzulf heb ik de noamen van de hoofdpersonen veraanderd.
 ……………………………………………………………………………………………….

‘t Gasfebriek.

Hennerk Stuut waas al ‘n dikke twinteg joar bie ’t
gasfebriek. ‘t Waas gain vetpot doar – mor toch….
het ging Hennerk mooi genog.
Of hai ‘t aans begeerde– gaf hai hail gain bliek.

Hennerk haar zog bie ‘t febriek in aal dij joaren
duchteg weerd. Eerst in ‘t grondwaark– dou
sjeveur. Dou as onderholdsmonteur.
Haar hai ‘s oavends noa zien traauwen nog veur
leerd.

Hennerk waas ’n staarke kerel– stelde ain nait
geern teleur. Aaltied rusteg – mainst sums blied.
Aafke wol hom nait groag kwiet.
Kinder wazzen wies mit hom- en hai mit heur !

Zien kollegoa Berend Jonker– waas bie ’t onderhold
de man. Older mor gezond en staark. Rad en
schaarp- verbrand op ‘t waark- mit heur baaid waas
dat ‘n hail ervoaren span.

Bie de bovenboazen– direkteuren– heren van de staf
haren mainsten hail gain wait van voele handen
bloud en zwait. Ging ‘t nait goud din veur de balie
op ’n draf !

As mor even wat nait deugde ging ‘t bie Heren hoog
en leeg. Aaldernoarst wat ging ‘t der heer. Oren
deden die din zeer. Van wat of der aine din te
heuren kreeg.

Op n winterdag broesde dat gas mit groot geweld
deur ‘t net. ‘t Waas gewoon filaine kold. ‘n Beste put
bie ‘t onderhold. Bie ‘t febriek waas der vanzulf gain
vorstverlet !

Mit heur gele Daf van ‘t ain noar ‘t aander
hogedrukstation. Aalbaaid goud mit ‘t waark bekend.
Drok genog- mor alles went. Was gain denken aan
dat wat gebeuren kon (?)

Ales duchteg in de greep- gain problemen– ales goud.
Dou doar in dij boetenwiek. Beste twijspan van ’t febriek
en toch ging der wat der fout kon- aalmoal fout.
Bernard draaide krekt as aander keren sluter eevm dicht.

Niks biezunders– hail gewoon. Filters mozzen ja weer
schoon. Toch verloor hai dou mor zo zien evenwicht.
Zo is ’t dou omtrit wel goan– mit de filters in de weer
Valen– graaien om zok tou- sluter open trokken– dou
waas’t in ainmoal gries mit zoveul atmosfeer.

Denkelk kwam hai nooit in ’t in. Waas hai meschain te
verheerd ? Hennerk ston bie deur en zaag- dat  zien
kammeroad der laag’ mor van dou of aan ging ‘t hailndaal
verkeerd.

‘t Was mor even- was ‘t doar binnen graauw en
duuster as bie nacht’. Hennerk kon hoast niks meer zain
mor kreeg zien kammeroad bie bainen. Moar noa stap veur
stap haar Hennerk niks gain kracht.

Niks gain macht meer om te slepen– ook gain
macht meer om te stoan. Brandweerkerels– maskers
veur- vonden heur liggend doar bie deur.
Mor dou waas ‘t der veur aalbaaid laang al wel doan.

‘Mirregs– Berend wuir cremeerd-  mirregs – Hinderk
kreeg zien graf. ‘k Ston der bie mit kloet in haals.
Mor ik vuilde mie zo vaals bie ‘t geprummel van dij
Heren van de Staf.

Want ik dochde eem Ie ? Ie hemmen joe toch nooit
wat steurt aan hou of’t hier mout en heurt. Mor
noe holn ie joen fersoun ?
Doar is ‘t nait mit of te doun ! Haar ‘t mor eerder doan –
waas dit din ook gebeurd ?

……………………………………………………………………………….

Waas hin boeten lopen Hennerk noar dij sluter – regelrecht
Doarveur was dat ding der zet. Din haars Berend ook nog red.
Dicht dat ding– de pleures dij der wat van zegt !
Haar dat duvels ding ‘n slinger geven– even biegoan – dicht is dicht.

Klain gedailte van de stad haar din eefkes niks meer had
mor doe zaags die al veur ’t Herenhooggerecht ?
Zaags heur veur die achter toavel – stoense koppen –
proemezoer ?
Pet in haand en op de mat ? Heurdest vroagen– Wat is dat?
Kin je ‘t waark nait doun – is ‘t aalmoal weer te stoer ?

Draaigen mit ontslag of schorsing – degradoatsie en zo meer.
Aal dat toerloze gemekker – ale doagen nog weer gekker. Wat hest docht
miejonge Henderk – ik nait weer ?

‘k Huil mie stil– zo dom- woarom– der zat mie wait ik wat in weeg.
Ik heb’t nooit zegd wat of ik wos. Nooit aine dee wat aigelks mos.
lk haar mien reden dou en nikte neeg en zweeg.

…………………………………………………………………………………………..

Dij baang is wordt nait rekend-  Dij zok stil hold krigt gain recht.
Ik heb zwegen dou dij tied. En veul te loat heb ‘k ook wat zegd. 

……………………………………………………………………………………………