Rond en om

Rond en om– rond en om
rond deur de tied.
Hier weer wat vonn –
en doar weer wat kwiet.

Rond en om– rond en om
rond reuzenrad.
Dij aine dij krigt ‘t nog –
dij aander het’ had.

………………………………….

‘k Haar trappers mit blokken
en moeke druig rokken.
Ien keuken– bie geutstain–
‘n kopern pomp.

Noar de moan– nee dat kon nait.
T.V. dat beston nait.
‘n Lapke op knij en ’n kram
op de klomp.

Sums zaag ik noar steerns
Sums vocht ik oet eerns.
Wat goud waas– waas goud
wat verkeerd waas– verkeerd.

Voak laag ik in duustern
noar wereld te luustern.
Geluden van olden– van
proatjen bie de heerd.

’n Jampot mit kikkerrit.
Slakken– ik nam heur mit
Buutsen vol ekkels 
en din gaauw noar hoes.

Torren en tieken
en mou ’n ie ais kieken….
meester doar veuraan bie
‘t bord lopt n moes!

Bie deuren aanbellen
en koksen oetschelden.
Kwoajong– dikke bunzel–
‘n appeltjesdaif.

Mit vurrels deur bloader
van de bomen bie toren.
Een stuver verloren och–
wat ook n slaif.

De vledder in boeten 
dij zwaaide veur de roeten.
As t sums en din störmde
din tikde an’t glaas.

‘n Foto in zwaart wit
doar ik wat veuraan zit.
‘n Juf en ‘n meester mit ‘n
nijmoodse jaas.

Mien boksems dij joaren
‘t was aal stuutsiekoren.
De wichter in petticoat –
strikken in t hoar.

Gain zin meer aan leren
mor meer aan verkeren
en stoadegaan wuir ik
de wereld gewoar.