Astoe van mie gaaist.

Mien Tinie en ikke – wie bennen alweer
47 joar bie mekoar.
Mor ik vroag mie – hail sums wel ais of…
Hans kereltje hou zols der din veur kommen te stoan
as dien Tinie op n kwoaie dag zeggen zol…
Laiverd t is veurbie veur ons baaid.
’t Is oet – ’t is over – ’t is doan – t het west –
aju parreplu – schluss – passee – baybay – swaai swaai!
Mon amour çest finie.
Ik denk dat ik zeggen zol –
ik kin der nait bie…
want…

Astoe van mie gaaist – den goa ik emigreren.
Din loat ik mien loopschounn reanimeren.
Ik sjaauw noar Timboektoe tou en noar Tibet.
Doe heurst mie nait jammern of roupen of reren.
Ik goa in gebed doar of aan ‘t mediteren.

Astoe van mie gaaist – din loat ik mie bekeren.
Din hol ik vort òfstand van knippen en scheren.
Ik sjaauw noar Timboektoe tou en noar Tibet.
Doar loat ik din vort mien toepetje toeperen
en ‘t hoar oet mien oren en neus epileren.

Astoe van mie gaaist – din goa ik kamperen.
Mien rollator smeren – mien vlooien dresseren.
Ik sjaauw noar Timboektoe tou en noar Tibet.
Doar leer ik jongleren mit oapen en beren
en recht op mien middelste bain balanceren.

Astoe van mie gaaist – wat zel ik nog begeren.
Ik kin van miezulf nog gain scheet ventileren.
Ik sjaauw noar Timboektoe tou en noar Tibet.
Doar leef ik in ainvoud – en hogere sferen
mit niks meer as eerbeien – appels en peren.

Dus goa nog mor nait doe – hol ‘t nog mor eevm  vol .
Ik wil mit die laiver op fiets noar Foxhol.
‘Kwil nait noar Timboektoe tou – nait noar Tibet
mor mit die noar Termunten – of noar Potterwol.
Omreden dat ik aaid nog veul van die hol…