Haile wereld is kunst

Wees welkom doames heren.
‘t Is tied veur de cultuur.
Nait laanger spereweern
op dit gezegend uur.
Nait kwedeln- ains nait fluustern.
Hail eevm niks as plicht.
As zittn- kiekn- luustern.
Nait koggeln- mondje dicht!

Want kunst is ‘n vundeern
van ’t Loug- van ‘t laand en’t Stad.
Zo groot- vervuld mit weerdn.
Onzegboar is dij schat.
En’t zit ien wat of zanger zingt.
Ien’t schrift- ien wat de dichter dicht.
Ien kleuren dij de schilde mingt.
Ien woordn- zwoar of haildal licht.

Ien sprookjes- saga’s-‘n verhoal.
Theoter- ien meziek en daans
en klank ien’t ritme van de toal.
Wat het ’n mins din nait ommaans?
Musica- zaalf mien oren.
Doe zuzooist deur mien zail.
Doe lats mien gram vervoaren .
Doe teuverst mie ’n smail.

Wat mouwe din begunn
zunder ‘n Grunnegs laid!?
Dat wordt toch hier in Grunn
n Boudel van verdrait.
Din zing ik noar mien schema
sums bie de Albert Hein
de (Liddel) of de (Hema) dat laid van Augustijn.

Zo mooi- zo aaibels zuver.
Mor ‘k heb niks meer tegoud.
‘Krieg nog gain zeuvm stuver
in mien versleetn houd.