k Wens die n joar – mooi weer – n beetje zunneg

Gezelleghaid – n koekje bie de thee
Goud leven – in dit laand van melk en hunneg
n Beetje bliedschop en n beetje vree

Blief alemoal n beetje vrij van klachten

Nait te veul zörgen – laifst gain swoareghaid
k Heb n meroakel joartje in gedachten
Instee van bloud en swait en groot verdrait

Veur dikke managers en direkteuren
Heb ik n oafgemieterd vrome wins
As zai dat doun – din zel ik nait meer zeuren:
“Heur bonus dailen  – mit de medemins”

Veur de bejoarden roem genog te makken

Op kosten van Ol Voader Willem Drees
Fijn in de rietzepia dikkerdakken
Of veur n loempia noar de Chinees

En loat de boer zien vedde klaai mit kloetjes

Loat de boerin heur kast vol boerenbont
En dou joen lutje beudels doagelks doetjes
En omtrint drijmoal doags n schone kont

En loat we Grunnen – Grunnen blieven loaten
En nait verrommeln – dat is hail gewoon
Ons nait verkeerde kaant aan drieven loaten
Din blift t hier rij en roem en schier en schoon

En krigstoe sums en din de wind van veuren

Dat dut niks oaf – want dat kin gain gevoar
Bie wind van veuren kin die niks gebeuren
Dij waait de vaalse krullen oet dien hoar

Loat we de poletiek mor loaten rusten

Want wat ik vin – vinstoe meschain verkeerd
Mor k zol der menneg moal wel aine lusten
Bie wat ons Geert sums aalmoal röpt en reert

Nait ale klapscheet lopen hakketakken
In dit mooi – splinter-noagelnije joar
Nait aal gedureg mor wat hakkemakken
n beetje oareg weden veur mekoar

En ook veur ale dikke hereboeren
n Joar – vervuld van dege-degelkhaid
En veur de löslopende troubadouren
Toch ook n laid vol licht en luchteghaid

Veur elkenain n leven in de glorie

En gain gesukkel meer mit t miljeu
Dus laifst gain hittegolf in jannewoarie
En in augustus toch wel laiver deu

k Wens joe n laand van honderddoezend bunder

Doar t gruit en bluit van laifde en respekt
Doar kinwe aigelks sowieso nait zunder
Want zùnder dat is : “Wat de wereld nèkt”

Nait aal joen senten in de buutse holden
Dat bringt allind depressies en meleur
Loat asjeblieft dij eurootjes mor rollen
Geleuf mie mor – doar is dat goudje veur

Ik road de aaldergrootste baangeschieters

Zeg tegen aal joen angsten mor ajuus
En tegen aalderslimste kniezebieters
Joen aalderlèste himd het ècht gain buus

Ik gun de doodgroaver gewoon zien neren

Ik gun de overledenen heur rust
Mor toch – het aaldermainst – doames en heren
Gun ik de levenden heur levenslust

En hestoe sums en din de wind wat tegen
Din luuster even noar wat ik die brom:
Guster was t zun – vandoag is t aalmoal regen
Din dink ik – mörn is t meschain aansom

Om ale hörns en houken : “Iepekrieten

Boesappers – miesgasters” – het is n ploag
Mor loatwe nait vergeten te genieten
As t even kin wat laanger as vandoag

En lukt dat nait – din help ik die te hopen

Dat der n pad is noar de horizon
En dat je doar din nait allinneg lopen
Dat zol ik veur die regeln as ik kon