AACHT JANNEWOARI/GRUNNEGER BOUK

Aacht jannewoari was k te gast bie t Grunneger bouk.
Eerste doagen van t joar ging t op n herhoaling aan van jannewoari 2010.
Nijjoarsveziede dij dou pland was in Spoorzicht-Loppersom, wer twijmoal oetsteld omreden van snij en iezel. Oeteindelk is t der veureg  joar haildal nait meer van kommen. Mor op aacht jannewoari van dit joar was t deu en ellìn van iezel en snij was net vleden tied. Meschain datter doarom extroa veul belangstellen was veur dis normoal gesproken joarlekse
gebeuren (Dis keer onder de pannen van Hotel Faber op t Hoogezaand.)

Der was rekend op n man/vraauw of zesteg …….mor tegen tied dat veurzitter t woord geern hebben wol, wer der nog duchteg sleept mit extroa stoulen en oeteindelk zatten der n dikke honderd gasten te wachten op wat der veurbie kommen zol

Vanzulf dat ik nait veul mitkregen heb van watter veurofgoand aan mien optreden bekend moakt wer. Dizze man ston noamelk mit de gebrukelke trillemienen en bibberoatsies om n houkje te lieden en te wachten op t startschot. Mit aander woorden: Ik ston mit ogen op tilt en mit oren recht in t ìnne stiekom te  gloepen noar de spreker, longernd noar t moment dat mien noam nuimd wer.
Dat moment kwam dij mirreg laifst drijmoal en  ieder keer ging t aal goud-
beter of best. Gain vaalse start….nait stroekelderij…..nait diskwalifizeerd. In de pauzes tussen optredens deur- en ook achternoa  nog n poar exemploaren van mien nije spaigelploat verkocht …..wat wil n mins nog meer?

TWAALF JANNEWOARIE / NIJ PEKEL / KADDELIEKE VRAAUWEN

Twaalf Jannewoarie was ik op Nijjoarsveziede bie de Kaddelieke vraauwen ien Nij Pekel.

t Was der waarm en gezelleg. Der was overvloudeg  kovvie mit kouk of cake en vraauwlu wazzen zo aandachteg as hounder op t rik.
Kons n spèl valen heuren. Jammer dat ik gain spèl bie mie haar….haar ik t oettesten kind.
k Vuilde mie goud op stee en beheurlek op mien gemak bie dizze drijentwinteg wichter van rondomrond mien aigen leeftied. t Gehail haar veul weg van n hoeskoameroptreden.  De sfeer wer mìt bepoald deur de klaine besloten roemte. Van dij gevolgen was t nait neudeg om t geluud te verstaarken en dat gaf toch n hail apaart gevuil.

As ik t veur t oetzuiken haar……………..Ik zol zeggen…..Dou mie din ale weken op n deurdeweekse oavend mor zu ’n pebliekje…….zu ’n woarderen………zu ’n sfeertje……….Pekelder Ol Wichter …bedankt!

VATTIEN JANNEWOARI / WAARVUM/ OPROAKELDAIS

Nijjoarsveziede in t gebaauw van Oproakeldais in Waarvum veur lu dij op ain of t aander menaaier mit dat joarlekse spitoakel van doun hebben, sprak mie op veurhand slim aan.
Dat komt reken ik ook , omdat ik doar aacht joar touholden heb dou Waarvum nog n zulfstandege gemainte was. Op t heden ligt dat durp aan t voutenind van gemainte Eemsmond en dat feit dut mennegain mit weemoud en wìnst weeromzain.
Nog drij  joar en din  is  t Stichten Oproakeldais  tou aan organisoatsie van
VIEFTEG JOAR  OPROAKELDAIS. Dat zu “n mega evenement zo laang overleven kin, veurnoamelk  deur de inzet van vrijwillegers oet n betrekkelk klaaine gemainschop, …..zegt mie hail veul.

Vattien jannewoarie bin ik o.a. weer even tegen n poar van dij toaie gasten aanlopen doar ik  in de joaren zeuventeg,  in t twijde,- en enkeld in t eerste elftal van Waarvummer voetbalverain,  mit op t veld ston te streupen……men kiekt mekoar aan en denkt: “Woar blift de tied!?”

Wat ik zeggen wol….: “Dij nijjoarsveziede van Oproakeldaisminsen in Waarvum haar k  echt nait mizzen wild,  mor t was wat mien zingen aangaait n stoere aangelegenhaid. k Haar ’s murns dou ik te bèrre oet kwam n stem: “Doar vlogen de scheuren van ien t behang.” Dokter het mie der n poar pilletjes veur doan …..en woarachtig…tegen vief uur noamirregs kon ik veureerst weer hail veurzichteg,  mit  handen en vouten tegen toonledder omhoog kroepen.

Groutnis……………………………………………………………Hans