< Terug noar overzicht van mien Dagbouk

Prezentoatsie “Vannijs geboren”

Dagbouk RSS

Prezentoatsie spaigelploat VANNIJS GEBOREN in Schanze.

Nooit eerder zo n ploug mitmoakt……swoagers – schoonzussen – nichtjes – dochters – mien betere helft – en ik zee de gek….
Gain ploug van honger en durst,  mor n ploug van vroleke aanpakkers. Van dij gevolgen zatten wie zundag 21 november om twij uur al kloar en  te wachten op ons eerste gasten.

Vrijdag en zotterdag teveuren waren wie ook al as iemen zo drok in de weer  mit t ombatterijen van de waarkploats van De Olle Remise in Schanze.
Dij Olle Remise (1878 – Oude Zijl 1) speult zok leste tied aal meer in de kieker. In t gedaailte doar t Grand Café zien sfeervol stee vonden het, is sikkom deurlopend wat te doun.
Sund 19 augustus, het in n aander gedailte van t historische pand, t
Kunstencentrum van t Stichten DE GRAANREPUBLIEK zien onderdak vonden.
t Stichten veraainegt dik datteg kunstenoars en artiesten dij zok o.a. tot doul steld hebben om t kulturele vuurtje in t Oldambt wat aan te bloazen d.m.v
bieveurbeeld tentoonstellens – kunstedukoatsie – meziek – en theoaterveurstellens.

Zundag 21sten november konden wie nait terecht in t Grand Café, mor gain nood:  “De Graanrepubliek brocht oetkomst.”  Vrijdags stonden doar in de waarkploats al gaauw roem honderd stoulen in t gelid.  Zotterdag hebben wie t geluud opsteld en oettest,  glaswaark kloarzet,  en de Aldi en de Albert Hein plunderd .
De waarkploats was zundag veraanderd in n minitheoater. De hapjes – de drankjes – de spaigelploatjes – de toiletten – mien gitaar- mien hoge houd……t ston aalmoal te wachten op t uurvan de woarhaid.

n Enkeling kwam nait opdoagen mor oeteindelk waren toch ale stoulen bezet en mos der op t aalderlest nog wat aansleept worren. k Heb middenmaank
zoveul minsen nog nait voak zo n ontspannen sfeertje pruifd.

t Gedaailte mit de introduktie en n zestal laidjes, (mit tussendeur kurte vertelsters), duurde aal mit aal drij ketaaier.
Henk Scholte wer tussendeur nuigd om t  noagelnije spaigelploatje van mie in ontvangst te nemen. Ook Rolf Schreuder van Rtv Noord was aanwezeg. Baaide mannen goan wat mie betreft nog mor even stoef deur mit t promoten van t Grunningstoaleg laid en Grunningstoalege artiesten…

DAT BRINGT N MINS DER TOU OM DER MIT DEUR TE GOAN !!!

Noa de presentoatsie volgde  der n oetstapje van n haalf uur onder laaiden van n aantal prominenten van De Graanrepubliek. Dij lu namen t haile spul op sleep noar t  grode aangrenzende  meseum van t Stichten en zai gaven informoatsie en oetleg over wat doar zo al te zain is  (En dat is nait gering!)

Aal mit aal is t spaigelploatje VANNIJS GEBOREN op  21sten november weerdeg  deupt. Elk dij bie dit gebeuren tegenwoordeg was,  wordt stief bedankt. Ie hebben noamelk  zulf biedroagen aan n hail biezundere sfeer.

Biezundere dank gaait ook oet noar Bert Ridderbos
Bert het verschaaiden nummers op t spaigelploatje hail septiel opwoardeerd mit accordeon –  bas – en gitaar. Boetendes het hai de techniek veur zien reken nomen. Schaand genogt kon e nait bie t gebeuren aanwezeg wezen.
Ook dochter Vita van der Lijke kreeg n dikke pluum en n bos bloumen
veur t kurege- kunstege design van t  gehail.

Fré Schreiber wordt nuimd op achterkaant van t tekstboukje as kontroleur van de spelling (Gain overbodege luxe) en veur Tinie Hoek haar k aaigelks n standbeeld in gedachten want t wicht het vanzulf  hail wat meer biedroagen aan “Vannijs geboren” as bloots  t aanlevern van heur fotomaterioal.

Veul gasten hebben mie bie de boetendeur heur woarderen blieken loaten veur wat heur de mirreg boden wer. Verschaaiden moalen heb k dou zegd dat ik t  zunder mien geweldege achterban nait  red haar.

Katie – Nico – Harry – Lenie – Marjolein – Barbara – Suze – Tinie

STIEF BEDANKT !!!

Zet n reaktie op stee

Velden mit n * binnen verplicht

< Terug noar overzicht van mien Dagbouk