Kerk ien Noordbrouk

Deur: Hans van der Lijke | Op stee zet: 15/11/2010 | reageer! »

n Daam – 14 november

Wat t weer aangaait, waas t dis zundag mor n dag om ien de gruine bak te doun.

Dou k nog as concierge deur de laange gangen van de Meentschool ien Winschoot parredeerde, kwam mie voak n kereltje ien de muide.
t Jonkje haar n licht sproakgebrek en zaag der mainst wat bekommerd oet omreden dat de wereld hom bliekboar nait recht bekoren kon.
“Nissaan meester Hans”, zee t kereltje din voak.

“Nissaan meester Hans”, zee ik vanmurn tegen miezulf dou k gedienen
van sloapkoamer bezied schoven haar. Graauw, dokeg, motteg novemberweer.

Echt weer om noar kerk te goan, nait mit n psaalmbouk onder d aarm in mien gevaal, mor wel mit mien tekstbouk en mien gitaar.
Veur de kovvie mos k der nog even nait aan dinken mor stoareg kwam de zin boven drieven.
Om haalf drij zatten Jantina en ikke doarom al klip en kloar te wachten.
Wel zollen der op dizze sjompege dag ien Hervurmde kerk van Noordbrouk luustern willen noar Hans van der Lijke?
Dat vil nait oaf. n Vatteg kuzzentjes werren der oeteindelk bezet.
Mor Hurre wat waas t kold…..”Nissaan” Doar kon organisoatsie ook niks aan doun. Dij lu haren heur oeterste best doan mit lekkere kovvie ien de pauzes van de veurstellen.
Deur reusters bie t voutenind van de banken stroomde waarme lucht….ook al nait verkeerd. Jammer datter deur de prachtege roamen van de kerk zok gain stroaltje zunlicht speuren luit. Eerder n moal….n dik joar leden…. haar ik ook al ais ien dij prachtege kerk west. Dou beleefden wie t meroakel van deurzichtege bundels zunlicht. Dij villen doar diagonoal oet de hemel deur de meterhoge roamen en brochten teuver op t interieur. Ik docht dou hail eefkes: “Zols der hoast geleuveg van worren!”
t Historische gebaauw is gelukkeg ien joaren zesteg mit toaie moud en ienzet verdedegd en mit zurg en kunde van ondergang red.

k Heb goud mien best doan bie dit optreden. Ik kin allind veur miezulf spreken mor ik loof dat mainste bezuikers t wel woardeerd hebben. Der is gainain veur t zingen de kerk oet goan en mien nije spaigelploatjes vlogen over teunbaank.

Doar ik zat te speulen en te zingen ien t middenpad, waas der gain waarme lucht bie mien hakken en tonen laangs.

Dou de veurstellen doan waas waren mien bainen tot aan t kruus van bevroren gips. “Nissaan meester Hans” docht ik weer hail even. Mor ik maag nait kloagen want rechts achteraan zat hail dudelk zichtboar n man mit n drup aan neus.

Hier thoes, achter mien pc, is t deu, en t optreden ien de Hervurmde kerk van Noordbrouk zel ik bewoaren op de bovenste beste plaank van mien herinnerns.

——————————————————————————————
Nog even wat over mien nije spaigelploatje “VANNIJS GEBOREN””
Ie kinnen t bie mie bestellen tegen € 14.95 incl. verzendkosten