Wat n winter hewwe beleefd. t  Aine proeksel snij over t aander op de riepen en op weg. Dou deu veur eerste moal bie lutjen begunde, kreeg ik weer hoop op betere tieden. Overaal kwam t ofval van vuurwaark en hondestront  van dezember weer wat onder t klaid vandoan.
Mor man wat het t noatied nog n zet duurd eer dat we bie t veujoar aanbeland wazzen. Vandoag binve der haildaal deur. k Heb mien baaide melkvlezzen ien n kurde boksem stoken. Ik geleuf der weer ien. Wat is der nou mooier as t veujoar ien Grunnen?

Refraain:

Wat is der nou mooier as t veujoar ien Grunnen
Dij wondere wereld hier vot bie de haand
Wat is der nou mooier as t veujoar ien Grunnen
t Veujoar ien t grasgruine Grunneger laand

……………………

De grutto s en kivieten roupen mekoar
De wolken dij spaigeln zok – helder en kloar
Ien t wotter van t Wad en van t Zuudloardermeer
Aal joaren mit meertmoand is t veujoar de weer

 n Feest om te zain – as de hoageldoorn bluit
De lammer dij speulen en daddeln zok muid
Om mirreg din ist sums aal hail even lij
Bie veujoarsdag liekt haile wereld as nij

De sprutters lewaaien en baauwen n nust
t Is aaltmoal bedrieveg – aal leven en lust
t Is Grunnen ien geur en t is Grunnen ien kleur
Aal veujoar wak roek en aal veujoar wak heur