Prezentoatzie van Hans zien vaarde spaigelploat komt mit grode
stap-stappen dichterbie. (23 November)
……………………..
Dij blinkend nije spaigelploat mit wel weer zestien nummers is weer
opnomen bie: Bert Ridderbos en Linde Nijland en is op’t heden al op
n flinterdunne hoar noa veur de bakker.
Vannijs hemmen dij twij baaiden mie weer verrast mit heur technische
en muzikoale hoogstandjes bie zo goud aal dij zestien nummers.
( Om ’t eevm roegweg te zeggen: Tinie en ik hemmen mit open bek
zitten te luustern noar mien bloudaigen laidjes.)
………………………..
Op ’t heden wordt der op mien aanvroag nog n technische klaineghaid
bieschoafd aan twij nummers en din is t kloar.
Dat wil zeggen din gaait ’t spul noar mien dochter Vita dij weer mit n
biezunder mooi ontwaarp veur de  dag kwam veur de verpakking van
’t produkt. Schoonzeun Rene Diekstra regelt din nog de fibeldekwinten
rondom de persing en de  ditten en datten mit Sony. Mien dank is op ’t
heden al meer as groot want ik zol der aal mit aal nait deurkommen kinnen
en der ook nog aivege kopzeerde bie oplopen.
……………………….
Ook de doatem van de prezentoatsie en woar dat weden zel is al bekend.
Wie holden ’t dicht bie hoes en dat zel weden: In dat hail biezundere
kerkgebaauw dat bekend staait onner de noam van Kabzeel. ’t Staait in ’t
sentrum van nDaam…..oftewel Appingedam.
( Ie mouten joe doarbie veurstellen dat op de  twijde lettergreep  van “Kapzeel”
twij puntjes heuren te stoan……. Mor spiet mie genogt….ik kin heur eefkes
nait vinden.)
…………………………..
’t Is n mooie stemmege roemte mit nait te veul overtollege fiebeldekwinten
en ditten en datten doar rond wel drijhonderd mannen en vraauwen heur n
schier plekje oetzuiken kinnen.
(Dus roemte genogt zol’k dinken) Doatem van de prezentoatsie is oafsteld op
zotterdagmirreg 23 November.  
En vanzulf zellen wie probaaiern om van dij prezentoatsie weer n feeststelk
gebeuren te moaken doar ie vanzulf dizzen spaigelploat aanschaffen kinnen
(En even zo goud ook mien eerder oetbrochte Spaigelploaten aanschaffen
kinnen.) (E denk der om – as ie wat kwiet willen – tied van Sunterkloas is den dichtbie !
Ik verheug mie der op. Groutnis en wie zain nkander ! Kovvie en nog meer staait
kloar!

Aanmelden