Archief veur juni, 2019

Rondje Noord 146 -nDaam omtou.


 

 


N DAAM OMROND EN OMTOU.
 

Wait ik nait recht van wat of hou
din gaauw weer eevm nDaam omtou
Bewegen lu – dat is gezond
En doarom loop ik  nDaam omrond

Of heb ik ’t ook nait recht aan tied
nDaam omtou en ik wor blied
Of bist ook swaart of broen of blond
Kins aaltied eevm nDaam omrond

Mooi loopke – mit of zunder hond
Goa mit joebaaid mooi nDaam omrond
Mien moeke was drijhonderd pond
Mor kwam nog makkelk nDaam omrond

nDaam omtou is nooit verkeerd
Om mie goan ie gewoon op peerd
nDaam omrond – zo is t mor net
Om mie goan ie op autopped

nDaam omtou veurlaangs ’t kenoal
Mit elkenain en alemoal.
Mien opoe was n slonterkont
Mor zol en wol nDaam omrond

Mien opa – aaltied briek en brak
Mor nDaam omtou mit groot gemak
Ik zel nooit zeggen dat dat mout
Mor nDaam omtou is aaltied goud

Op hozevurrels – alemoal
Wel dut die wat doar bie ’t kenoal ?
Van zitten krigs n pladde kont
En doarom zeg ik: nDaam omrond!

nDaam omtou – doar is ’t gewoon
nog roem en rij en schier en schoon
nDaam omtou- dus waist wel wat?
In ’t in en bainen onder ’t gat

n Daam omtou is nait verkeerd
Din worren ie ’t lopen nait verleerd
Aal doagen weer n Daam omrond
Veur niks en ook nog slim gezond

nDaam is meer as muite weerd
Bewegen is ja nait verkeerd
nDaam omtou is wonderlaand
nDaam omtou is golden raand

‘k Wait omtrent wel van wat of hou
nDaam is ’t aaldermooist omtou
nDaam doe moaks mie aalweg blied
Ik wil die never-nooit-weer kwiet

’t Is hier ja schier en roem en rij
’t Is hier antiek en noagelnij
nDaam- n stee zo geef en goud
Veur die licht ik mien hoge houd

’t Is naarns beter – en zo is’t
dus blief veur aaid zo astoe bist
nDaam – doe hest n golden raand
aan binnen – en aan boetenkaant.

Bist stafold mor nog laang nait gries
En zings nog aaid dien aigen wies
Over dien wonder binnenstad
heb ik ’t din haile nog nait had

Mor ‘k wil nog liekoet zeggen dat…..
Doe bis mien aaldermooiste stad.

………………………………………………………………………………

Ainmoal in omtrint vattien doagen op dit stee twij
gedichtjes (dis keer mor ain)
En ain of meerdere foto ’s van Tinie der bie tou.
Foto ’s en gedichtjes vertellen joe wat over n biezunder
of wondermooi stee woaraarns in n noordeleke regio.
Goa veur meer Rondjes Noord noar Dagbouk en
scroll omdeel.