Streektoalfestival

Dut mie deugd dat ik ien November weer n moal
terecht kom ien t Noabershoes van Veelerveen.
Op dat stee heb k al ’t ain en aander mitmoakt aan
wat doar deur de joaren hin aan kultuur veurbie kwam want ien
dat luddek dörp staait de wereld echt nait stil.
Veelerveen zel boetendes ankom joaren overgoan ien dij nije- veul
grodere gemainte “Westerwolde.”
Dut mie deugd dat lu in Veelerveen doarom liekoet wieder goan mit
’t organiseren van n grootschoaleg evenement op Zotterdag
3 November 2018.
t Idee is om vanòf 16.00 u. doar te starten mit n riege optredens
van Grunneger troubadours oet dij noagelnije grodere gemainte
Westerwolde. k Bin der slim wies mit dat ik bie dij riege nuigd bin.
Veuraal omreden dat ik  onderhand toch al wel weer aacht joaren ien
nDaam touhol.
Mooi man – dat ze me toch nog ien de kieker hemmen ien Veelerveen.
Vanoet mien haart kin k joe boetendes verzekern, dat veur mie dat
“Mooi dörp” nooit verloren gaait. Vieventwinneg schiere laange joaren
hemmen wie doar beleefd en ’n laanger riege op àin stee haren wie
eerder nooit beleefd.
Tegen tied dat ’t zo wied is heuren Ie der wis nog wel meer van.

Groutnis – gezondhaid – veurzichtg…. en nait bie t daip kommen!

Hans van der Lijke

Dat wordt vast en zeker een pico-bello feest bij Amber Huisman
in Den Andel op 11 maart 2018.

Dat is een week en een dag na haar echte verjaardag maar dat
zal hem de pret niet drukken.
Het is de bedoeling dat ik er zelf niet alleen alcoholisch- maar ook
muzikaal tegen aan ga !
( Best best te doen hoor- die combinatie – alleen wel de articulatie
wat in de gaten houden)
Mijn oudste- mooie- lieve kleindochter is dan 18 jaren geworden
en dat is toch wel een mooi feestje met bijvoorbeeld een splinternieuw
liedje tussendoor wel waard.
Het wordt vast eg druk en leuk en lekker, zoveel is al wel zeker en
eigenlijk is het wel jammer dat het alleen bestemd is voor familie
vrienden en genodigden.
Ik verheug me er op!

Mooi veuroetzicht veur mie om weer ais n
besloten optreden te doun bie n femilie doar
ik joaren eerder ook al ais te gast was.

Veur de femilie en vrunden van dij femilie
besloten vanzulf – mor doarom wel hail appaart
om te doun.

As ie ook ais n moal zowat ommaans hemmen
willen din neem mor gerust kontakt mit mie op
want ik bin mainst drijdubbelt zo wies mit van dij
nuigens!

Wandelweekend  ankom drijentwinteg juni 2018.

Moi lu !

Duurt nog n zetje – wait ik wel – gaait eerst nog hail
veul aans wat gebeuren veurdat ’t zo wied is – mor din……!!
Din zelt’ weer weden. Din doun ie de koierlatten
mor weer onder t gat en din mor lopen deur t mooie
Westerwoldse laand.

Start 17.30 – finish 21.30 – t Mooi weer is besteld!
Muite weerd lu – k wait der van – ‘k heb ja viefentwinteg
schiere laange joaren touholden in Westerwolle.

Ie zellen joe onderwegens boetendes echt nait vervelen.
Is genog te doun.
Staatsbosbeheer is op t appel en wieder is der woaraarns
op ’t trajekt n tenailveurstellen te beleven. Ook is der n ezelstal
en doarom reken ik datter ook ezels binnen.

Mooi man – mor loat ik miezulf nait vergeten. Ik zit of loop
bie de meulen (Weddermarke) en ik speul en zing doar veur
joe de sterens van de hemel.
Mor as ie der niks aanvinnen loop din mor gerust deur want lopen
is gezond.
Meschain zain wie mekoar doar wel en ik neem in aalsgevaal
n poar spaigelploatjes mit. (Kins nooit waiten)

Tot kiekes op zotterdag 23sten van ankom junimoand

Moi!

Golden bruloft veur Bert en Henny

Henny kin ik nog nait mor dat zel gaauw
veraandern omreden dat dij twijbaaiden
ankom 16 dezember viefteg joar traauwd binnen
en omreden dat ik nuigd bin om doar n muzikoal
kleurtje aan te geven.
Hail biezunder – ook veur dizze man want mit Bert
zat ik veur n dikke 60 joaren terug ien t zulfde
juniorenelftal (B 2) van de voetjebalverain Roon)
(Roden) – in 1955 binwe kampioen worren.

Wie moaken der mitnkander wat van op dij heugelke dag
doar ien Café Beuving ien Bavvelt. t Is vanzulf besloten
mor ik kin t nait loaten om der hier toch eefkes melding
van te moaken.

Is vanzulf besloten mor…………………………..

Zanggroep Flexibel oet Faarmsom is
op zotterdag dattien jannewoari ais n oavend
allain veur zokzulf bezeg op heur vertraauwd
repetitiestee (Café Pijpplein ien Faarmsom)
Dij oavend hemmen zai heur nijjoarsveziede
en mag ik onder bedrieven deur doar aan de bak
n Schiere oetdoagen – nait din?
Komt aal goud – ik kiek der noar oet – wordt
veurvast n gezellege  en leerzoame oavend

Zundag 17 dezember is der ien t Hof van Daam
(Dijkstraat 57 Appingedam) vanof 14.00 u
wat te doun.
Lu droagen veur – doun heur vertelsters en zowat
meer en k bin zulf ook nuigd om mien verskes
heuren te loaten.
Om entree huiven ie t nait te loaten (twij euro leufk)
en doar hemmen ie as k mie nait vergis ook nog
n kopvol kovvie veur – of thee.
t Het doar eerder al n moal te doun west mor dou was
k verhinderd mor ankom raais zel t mie nait ontkomen.
meschain zain wie mekoar in Daam1

Zotterdagoavend 23 september 2017
Klaas Spekken en Hans van der Lijke
in t  kerkje van Veelerveen.
Dut mie deugd en t is mie n eer dat ik doar
soamen mit Klaas een oavendvullend
programma veur t voutlicht bringen maag.

Veelerveen is hailege grond veur mie – twij dochters
en n klaindochter binnen doar geboren. 25 Mooie
joaren hemmen wie doar beleefd.

t Spul begunt om 20.00 uur.
Ik kiek der noar oet!

De Protestants Christelijke Ouderenbond
is der vroug bie om mie te vroagen veur n optreden
op dinsdagmiddag 10 april in gebouw Concordia – in Baflo.
Mooi om te waiten dat ik veur t ankommen joar ook
al weer wat in de agenda stoan heb.
Wie zellen der mitnaander n schiere middag van moaken.

Slecht bericht en goud bericht tougelieks.

n Zetje leden heb k bericht kregen dat “De vrienden
van Noord” zokzulf opheffen zellen. Dat is jammer
vanzulf want Noord kin best n poar vrunden gebruken
mor t gaait zo as dat mit verainens wel voaker gaait:
De animo en de fut gaait der bie summegen op de
laangere duur weer wat oet en der is ja ook aal meer
doar n mins zien aandacht aan geven kin.

Wel mooi datter nog n beetje in kas is bie dij vrunden en
dat ze dat op ankom 20 maai spenderen aan n ofschaaid
in de Tramwaarkploats van Winschoot. t Is vanzulf allain
veur de leden en t speult zok oaf tussen 20.00 en 23.30
t Wordt n oavend mit optredens van De Stroatklinkers
Hans van der Lijke
Pauline Muis
Marten F. Grupstra