Was ik n vogeltje – ik vloog
Of was t ook veur t gemak
Zo ain twij drij bie baarg omhoog
Tot onder t hemeldak

Mor ik mout aalweg strieden
Veur elke haalve meter
Mout mien geroamte lieden
Ik wait gewoon nait beter

Ik trek mien moudveren ien t ìnd
n Beetje gember in de kont
En kiek ais even aan – òl vìnt
Toakelt zien honderdtagteg pond
Over de vlanken noar de top
Doar vindt hai zien verdainde rust
Wat n geluk want op is op
Mor t oetzicht is n laive lust
En doar was t aalmoal om begund
Doar vot onder de hemelpoort
Vanòf dat naauw beriekboar punt
Doar ligt veur t oog n vaaileg oord
Zo t liekt n stee veur pais en vree
n Wereld hail – nait haalf kepot
En mit vanzulf ook zunder nee
Veur elkenain n droagelk lot

Mor loat ik mie weer sakken
Zo muid – mou k sikkom spijen
Din heukeln mie de hakken
En knikken mie de knijen

Was ik n ronde vlint – ik zol
Mie valen loaten – aal omrond
En din nait eerder van de rol
As hail omdeel – op slichte grond