Gain kettenzoag – gain voag gerucht
Van minsen of motoren
Allind de wiend dij even zucht
En kibbert aan mien oren

n Dek van noalden en van blad
n Takje brekt onder mien vout
Mien voutstap veert over t pad
n Neefke joustert rond mien houd

En din inainen – open veld
n Deurkiek op n glanzend meer
n Stroom van wonder en geweld
Komt daldernd van de högten heer

Mit zuver widde kroagen schoem
Ik vuil geluk ien overdoad
Dis wereld is zo rij en roem
Roesket en broest van overmoat

Gain vaierboans – gain kloaverblad
Bie lutjen aan wor ik weer hail
Stap k over vlinten op mien pad
En komt der stilte ien mien zail