Alles hier is as verweven
Tot n geureg – fleureg klaid
Tot n overdoad aan leven
In dit laand dat Laplaand hait

Zoadjes mitwaaid – zomor oetzaaid
Tussen vlinten – tussen grint
Zunder teugels mit op vleugels
Van de rusteloze wind

Luchteg oetstruid – loater oetgruid
Tot n kleureg slingernd lint
In de baarm en laangs de beekjes
Want as leste snij verswint

Din komt as vanzulf de regen
Komt het veurjoar mit n sprint
Net geliek woar – aalderwegens
Daddelt din t lentekind

————-

Wat zel ik nog meer begeren ?
Febus stroalt hier nacht en dag
Spaigelt zok in vrizze meren
Flora vangt zien waarme lach