Dou mie – doar hoge bomen stoan
Dou mie mien voutstap op dat pad
Smeediesdern hek – twijduustern loan
Mit grind en mos en valend blad
Gain doul – gain dinken – gain woarom
En nait belast en nait belust
En doar oeteindelek ik kom
Dat dut niks òf – ik bin gerust

Mor geef ik hail even gain acht
Din komt ain dij mie dood verkloart
Mit spreuken om mien oren slagt
Van t aalderainegst woare woord
Zoain dij mie de hemel börgt
Ain dij zok bie mie binnen vringt
Mien wezen stoadegaan verwurgt
Ain dij mie op de knijen dwingt

Ain mit n stieve holten kop
Recht oet de konsistorie
n Mummie mit n puntmuts op
Dij gaalmt : Memento mori !