Refrain : t Is zowat n leeftied leden
Luip ik onbezörgd te weden
Mit n slovve pisdouk om mien gat deur t parredies
En nou stoa ik hier op t heden
Kin nait zeggen ontevreden
Ik bin netjes opdreugd – en ik bin al sikkom gries

Doarom zing ik – veur de tiekjes
En de iemen – en veuraal
Veur de lutje – en de dikke kikkers in de onderwaal

Doarom zing ik – veur de koien
Veur de koustront en de melk
Veur de vellen en de mellen en t gruinlaand en veur elk

Doarom zing ik veur twij zuchten
Veur n doetje – veur de ainvoud
Veur t luchten van mien longen – van mien haart en mien gemoud

Doarom zing ik veur de polder
Veur n older – veur n kind
Veur de wieken en de dieken en de wolken ien de wind

Doarom zing ik – veur biezunder
En ik zing veur wonderschoon
En veur hoagel en veur dunder – en veur zomor doodgewoon

Doarom zing ik – veur of tegen
Veur de vrijhaid en de plicht
Veur t zicht en veur de woarhaid – veur de kloarhaid en veur t licht

Doarom zing ik – veur t koolzoad
Veur de eerappels op t laand
Veur n wandeltje deur t dörp – mit mien klainkiend aan de haand

Doarom zing ik veur de deugd
En veur de vreugd en veur de zin
Mien genot en mien geneugt zolaank as dat ik zingen kin

Doarom zing ik – veur de golven
Veur de slichte wotterkaant
Veur de wilde wotterwolven – en mien voutstappen in t zaand