Blief doe mor bie mie doe – want din komstoe nait in nood
Krigstoe ale doagen beste botter op dien brood
Blief doe mor bie mie doe – want ik wil nog laang nait dood
Bainen onder d aarms en ik spring zo nog over n sloot
Ik wil mit die noar Stad tou – nait mit auto – mor mit train
Kieken bie t meseum – meschain is doar wat te zain
Ik wil nog over t Vismaart – van Grootmaart deur t Kolle gat
Mit die lopen – n ijsco kopen en n puut petat

Blief doe mor bie mie doe – want ik bin nait idioot
Wis  da k van t veurjoar onbespoten siepels poot
Blief doe mor bie mie doe – want din zet ik mie ien t rood
Koop ik die n noagelnije mooi torpedoboot
Mit die snuustern op de Rommelmaart in Winneweer
Bootjevoaren ien Zuudloaren – visken op t Schildmeer
n Lekkerbekje eten ien Termunten op t terras
Kommen wie doar de buren tegen – kerel dat is kras !

Blief doe mor bie mie doe – want doe bist mien lotgenoot
Din blief ik dien doezendbaainder – mit n holten poot
Blief doe mor bie mie doe – want din is mien vreugde groot
Aalbaaid tougelieks op bèrre mit de hakken bloot
Ik wil noar Paiterboeren mit de vöddels deur t sliek
Kieken over t wad en din mor gaauw weerom noar diek
En as der weer n winter komt din goan we weer aingoal
Deur de wind en veur de wind braidoet over t kenoal

Blief doe mor bie mie doe – mach ich dir ein Angebot
Dou ik die tien pallets – odeklonje – van Boldoot
Blief doe mor bie mie doe – mit ons baaid noar t oavendrood
Ik in mien knickerbocker en doe in dien – petticoat
Op n mooie dag mit de boot van Laauwersoog noar Schier
t levent is der om te leven – doarom binve hier
Feest op t dörp mien wicht wie goan vanoavend aan de zwier
Doe n widde wien en ik n lekker potje bier

Blief doe mor bie mie doe – want din komstoe nait ien nood
Krigstoe ale doagen beste botter op dien brood
Blief doe mor bie mie doe – want ik wil nog laang nait dood
Bainen onder d aarms – en ik spring zo nog over n sloot

Zo nog over n sloot
Zo nog over n sloot
Of der middenien vanzulf !