Ien t westen dooft n gele laamp
Maank graauw en blaauw en blaike daamp
t licht ien t oosten noadert raand
Veurzegt n koperkleurenbraand
En t kleurenspul dat din begunt
Is aaltied aans – nooit ainder sunt
Het mörnrood van Genesis
Gain mörnrood dat ainder is

Ik speur gain zuchtje wiend – mie ducht
Heur gain geluud – gain voag gerucht
t Is juust zo stil dat ik mien bloud
Mien haart – mien oam – wel heuren mout

Nog ruiert zok gain twieg – gain blad
Niks meer of minder nog bie t pad
As porren en n vleddermoes
Dij rondomrond- en boven t hoes
Aal dounde mit dat hom voldut
Zien hoaken deur t twijduustern schut

En ik – ik stoa van hoat vervuld
Mit schop ien haand – vol ongeduld
Te wachten bie n mollebult
Doar heb k die vrutter – aigen schuld !