Archief veur december, 2012

Tied as wotter


Tied as wotter     (Foto ’s Tinie Hoek)

Ik wer twinteg – smui as botter,
Vereg as n jonge hoan.
Ik haar tied – zoveul as t wotter,
Van de grode oceoan.

Ik wer datteg – recht van leden,
Zunder pien en zunder zeer.
Zunder zurg en zwoaregheden,
Tied as t wotter van t Schildmeer.

Ik wer vatteg – staark en stroalend,
As n zunnepit ien blui.
Ik haar zoveul tied as t wotter,
Van n dikke dunderbui.

Ik wer viefteg – zunder kwoalen,
n Beetje wìnst sums – n beetje blues.
k Haar nog zoveul tied as t wotter,
In de viever achter t hoes.

Ik wer sesteg – stief as vroren,
Mor ien t veujoar rad ontdeud.
Ies en snij op tied verswonnen,
Tied as t wotter ien de geut.

Ik tel sikkom zeuventeg joaren,
Achternoa ging t aaibels gaauw.
‘Kon gain wotterdrup bewoaren,
Tied verswon as dook en daauw.

k Haar hier bienoa oversloagen,
Wat mie t aaldermainste heugt.
Aal dij schiere laange doagen,
Van mien jonkhaid – van mien jeugd.

Mor ik proost op t ankom joar,
Mit n glas gemaintepils.
Wens joe aalmoal tied as wotter,
En veur elkenain wat wils……proost!!!