Archief veur november, 2012

Wat komt en wat west het.


foto: Martin Smit

 

—————————————————————————————————

Vattien dezember viert Klaas Spekken veur daarde moal  dizze haarfst t feit dat hai al weer
twaalf en n haalf joar aktief is in de Grunnegstoalege meziekwereld. Ik kin Klaas
as n bevlogen zanger van t betere Grunnegstoalege laid en ik bin der groots op dat ik dij oavend
nuigd bin as ain van zien muzikoale gasten. (Net op tied weer kloar om t mit te moaken!)
Ankom vrijdagoavend zel dat weden in t  Kielzog – Hoogezand/Sappemeer (14 dezember)
Aanvang 20.–u. Entree € 15.50  (Dij entreepries is inclusief n drankje in de pauze)
info@kielzog.nl
Tel 0598 373777

Twijde muzikoale gast dij oavend is Janine Vos. As ie al even genieten willen din goa noar
www.janinevos.nl
en luuster veuraal even noar de vertolken van “A natural woman.”
Baaide oavends worren wieder aanvuld mit koorzang en muzikoal begelaaid deur n kundeg
koppel:
Richard Zoer op bas
Harm Pals piano-accordeon
Peter Deiman drums
John Kruisman gitaar

…………………………………………………………………………………………………………………………

ROESKERBRUG  26 – 10 – 2012

Nog even wat over oafgelopen tied omreden ik t op mien menaaier slim drok haar
mit meziek en aanverwante zoaken. Eerstens was doar op 26 oktober  n optreden
in Roeskerbrug. Lu hemmen doar al sunt tiedstieden de goie gewoonte om
ainmoal in t joar n Grunneger oavend te regeln.
Soamen mit mien kompaan Dolf Houwing hemmen we der n in n zoaltje van de
Daltonschoule n oavendvullend gehail van moakt.
Ik kin Dolf aanbevelen. Kins hom der wel biehemmen Mooie kurde vertelsters doar
hai mit veur de droad komt en doar minsen zok sums en din de buus oetlagen kinnen.
Gurtdreuge Grunneger humor.
Over miezulf heb k gain klachten had en k haar der dij oavend n bult oardeghaid aan.

 

BEEM  9 -11 -2012

9 Novemmer was k te gast bie de soamenwaarkende bond van Oldern in t Trefcentrum in
Beem. n Schier en gezelleg inricht stee hemmen ze der doar van moakt.  Wie vuilen mit  t gat in
de botter omreden wie aanschoeven konnen bie n buffet mit drij soorten stamppot. Vanzulf dat
ik muzikoal ook aan de bak mos en din loop ik sums onverwacht wel ais tegen miezulf aan.
Dat wil zeggen: Ik geef miezulf noatied aaltied n ciever veur mien muzikoale prestoatsies en noar
mien aigen gevuil was t mit n moager zesje wel kloar. Mor as k nog even n ciefer geven mag
veur dij stamppotschuddels din kom ik oet op n 9


VEENDAM – 11 -11 – 2012

In t Veenkelonioal Muzeum in Veendam was nommerdags wat biezunders loos rondom Gré van der Veen
Gré kreeg doar De Winkler- Prins pries oetlaangd en doar wazzen verschaaiden bekende gezichten
oet t Grunneger wereldje veur  noar Veendam oafraaisd.
Perfester Siemon Reker brocht ons weer ais bie de les mit n  kloar verhoal over t onderschaaid tuzzen
t Veenkelonioal Grunnegs en Klaai-Grunnegs en hou of datter deur de joaren hin bliekt dat t
Veenkelonioale Grunnegs stoareg aan ienvloud wint.
Der wazzen wieder vanzulf  hail wat woorden van hulde aan Gré moar dat zel gainaine vrumd
veurkommen dij dizze “Grand Old Lady” zo wied volgd het.
Dizze troubadour het in dat goud bezet zoaltje nog muzikoal van hom heuren loaten en noatied nog
weer n haandvol spaigelploatjes verkocht. t Kon wel oet.


 

SODOM – 16 – 11 – 2012

16 Novemmer bie “‘De Vrienden van RTV Noord”  (1200 leden) heb k n bult mooie reakties had
op mien biedroage aan dij oavend en omreden dat ik vot in t  begun aan de bak mos heb ik ontspannen
genieten kinnen van de prachtege ballads van  Agnes Woltjes.

What a voice – What a choice – What a Lady !!!

Stroatklinkers kwammen der achteraan en van de pure vreugde van t speulen en zingen van
wat dij knakkers weer omhaands haren,  begunden de lampen in dij Tramwaarkploats
doar in  Winschoot op t laangelest stoareg te slingern. De vrunnen van RTV Noord hemmen genoten
en  ik vanzulf ook!


26 – 11 Historia Oppidi Weddani


26/11/2012
20:00tot22:00

Moandag 26 novemmer in de Wedderburg te Wedde aan de bak mit
de  ballade:” t Gericht van Wedderburg.” (Schreven deur Jan Sibo Uffen.)
Dij ballade is mor n introduktie op wat der vot achteraan komt.
t Haile gebeuren draait om de prezentoatsie van n fulm van cineast Anton Tiktak.
Anton komt ankom moandag oet mit n nije documentaire  over de geschienis
van Westerwolle en de Burcht van Wedde en woar kin dij prezentoatsie din beter ploats
vienen as in de Wedderburg. Aanvang -20.00 u.
t Gebeuren is omreden van n bepaarkt aantal zitploatsen enkelt tougangkelk veur geneudegden
Jammer!

Rondje Noord 17 Stieve bainen


  Foto ’s Tinie Hoek

 

Gain elektries zunder droadjes

Zai stoan hier op heur stieve bainen
Tot aan Nordkapp – plicht is plicht
Mit heur vurrels tuzzen stainen
Bringen waarmte – bringen licht
want
Kin gain centrum zunder stroatjes
Kin gain mosterd zunder zoadjes
Kin gain boksem zunder noadjes
Kin gain kwedel zunder proatjes
Gain vergait kin zunder goatjes
Gain elektries zunder droadjes

 ……………………………………………..

Rondje Noord 17 – Noorwegen 2011

Dikke spin

Er lopen dunne draden – naar je weet niet waar.
Draden van daar naar hier – en daarna weer naar daar.
Het zijn de draden van een monsterlijke spin.
Die zuigt de wereld leeg – voor welvaart en gewin.
Hij hangt te feesten en te beesten in zijn web
met dooie vliegen en kadootjes voor de heb.
Die kan je winnen als je zijn belangen dient
wordt hij je heer en meester èn je gulle vriend.

…………………………………………..

Omtrint twijmoal in de moand op dit stee
n noagelnij Rondje Noord.  Goa veur meer rondjes
Noord noar
Dagbouk en scroll omdeel.