< Terug noar overzicht van mien Dagbouk

Vogelvlucht

Dagbouk RSS

Ie hemmen ofgelopen tied nait te veul meer van mie vernomen, doar wil ik even wat aan doun.

t Het niks mit meziek te moaken mor wie stonden in feberwoarie nog even op de laange latten ( in Tsjechie) (Niks broken – aal goud) mor t verkloart veur n dail mien laangere ofwezeghaid op dit blog.
Nou nog even over meziek en mien ankommende muzikoale fiebeldekwinten van dizze moand.
Begun dizze moand was ik even bie Jan Knollemoa op veziede. (Veur wel hom nait kin;…..Jan is al sikkom antiek….hai is nog van veur de oorlog  (april 1940)
Dat betaikent nait dat hai gain road wait  mit zien tied. Dou hai veur tien joar terug ofswaaide as theoaterdirekteur van “De Meulenbaarg” in Delfziel,  het hai n boerderij kocht in Spiek.
Doar het hai zok onder aandern zulf omschould tot pottebakker en doar is in zien pand n roemte veur inricht….. aan roemte gain gebrek. Dat is ain.

Nou punt twij: Jan het doar onder bedrieven deur onder dij gigantische kap wat realiseerd…..dat geleuven ie aigelks nait as ie t nait zain hemmen! Ik heb t wel zain!
Doar is n minitheoatertje in onderbrocht…zo laif….mit viefteg zitploatsen….zo kureg…alles der op en der aan…..velour….pluche…licht/geluud….gedienen….podium….net zo wies!
Nog n poar moanden knutern en klundern en din kin Jan zien joarenlaange ervoaren as theoaterdirekteur in dainst stellen van dit mooiste theoatertje van Noord-Nederland.
Ik reken da k ook n moal nuigd worren zel om doar mien kunsten te vertonen.
Googel op:  Jan Knollema
Ie heuren der veurvast meer van….hol dat in de goaten.

Punt drij; Ankom week zundag is der op t Knoal wat te doun doar ik mie slim op verheug.
Op zundag dattien meert bring ik doar in t “Streekhistorisch centrum”‘ , n ofwisselnd programmoa mit laidjes-vertelsters- en gedichten.
Doar is veul noagelnij- nog nait eerder brocht materioal bie, dat deupt is onder de noam:
“Levensbouk.” t Staait aaltmoal te gebeuren tussen 14.30 u en 16.30 u. Ik hoop dat ie veuraan te zitten kommen, din kin k joe in de goaten holden.
H. Hofman@streekhistorischcentrum.nl Tel:0599 612649

Ik  zol t hoast vergeten….mor ie mouten van mie verplicht even n hail biezundere webstee
opzuiken: www.dagvandegrunnegertoal.nl (Gaait over ankom 19 meert)

Groutnis……………………………………………………………………………..Hans van der Lijke

Een reactie op “Vogelvlucht”

  • Free Westerhoff schreef:

    Moi Hans,

    k Was der nog nait aan tou komen, mor k heb slim genoten van t toenconcert bie Klaas Spekken. Joe hebben der baaiden n aibels schiere oavend van moakt.
    tot aander moal
    gr
    Free Westerhoff.

Zet n reaktie op stee

Velden mit n * binnen verplicht

< Terug noar overzicht van mien Dagbouk