Engeltjes van hoger sferen

Engeltjes van hoger sferen – van Ons Laimeneer
Dakgeut sikkom vol mit veren – hai wat gaaiter heer
Ik docht eerst dat t sprötters waren
Mor zover as k wait
Sprötters schieten zok van de hakken – en engeltjes doun dat nait
Dij huiven gain kerstdiners te eten
Engeltjes binnen vrij
Vrij van schieterij
Mor wat bliekt – ik heb mie mishad – k heb mie zo vergist
Het mie ain in de buutse scheten – en in de kaggel pist

Engeltjes van hoger sferen – van Ons Laimeneer
Bozzem sikkom onder de veren – hai wat gaaiter heer
Engeltjes hemmen blaauwe ogen
Binnen goud gezond
Mor wat bliekt nou – dat is logen
Engeltjes binnen nait blond
Kiek – zit ain bie mien jannever
Dörsteg – zaik en broen
Moager min en doen
Vlooien – loezen onder de veren – ogen groot en rond
Kroezeg kopke – vol mit swellen – en mit de vlès aan de mond

Engeltjes van hoger sferen – van Ons Laimeneer
Koelkaast leeg – allain mor veren – hai wat gaaiter heer
Swaarten – gelen – broenen – rooien
Swaarmen mie om kop
Gooien – vlooien – kwingeln – knooien
Eten alles op
Gain genoade veur mien krintstoet
Mien rolloade –  vot
Och mien laive lot
Klundern – plundern – bedeln – kwedeln – Laimeneer wait mainst
Kin je heur de weg nait wiezen – noar de Sosioale Dainst

Een engeltje van hoger sferen – heurde dat en kwam
In ain roam omdeel en dee mie dou n tillegram
Was getaikend – Laimeneer
Mor doar veur aan doar ston
t Was toch wel verduld meroakel
Da k hom helpen kon
Hemel was nog aaltied aiveg
En nog nooit zo groot
Mor hai zat in nood
t Was zo’n drokte mit de feestdoagen – aan de hemelpoort
Waren weer zo veul verhongerd – marteld en vermoord