< Terug noar overzicht van mien Dagbouk

Kantens 29 augustus

Dagbouk RSS

Ien Kantens haar men oafgelopen zundag  hail wat biezunders omhaans doar ik eerder aigelks nog nooit van heurd haar. n Bedrievege kommizzie het doar dit joar duchteg waark moakt van n nijmoods fenomeen….n “Vertelfestival”
Al wied veur de zummervekaansie wer k der over beld en mit droadpost
wer t mie stoaregaan dudelk wat bedoulen was.

Dailnemers- gastheren- en gastdoames,  en lu van de organisoatsie trovven nkaander op 29 augustus rond  lunchtied ien t gezelleg woonstee van de femilie Lenstra – Boon 
Der was kovvie- thee- vris en veul te veul lekkers om t aal bie noam te nuimen. n Ontvangst zo as n artiest mainst mor ainmoal ien tien joar mitmoakt. Onder bedrieven deur werren ale ditten en datten nog even deurnomen.

Vief verteller(sters) vertrokken tegen haalf ain elk noar heur aigen onderkomen op n gastadres woaraarns ien t durp.
Veur mie was dat de grode veurkoamer van de familie Keizer aan de Pastorieweg.  Doar was k mit Jan Dijk oet Faarmsom rond tien uur al even aanwest veur n geluudstest. Jan zol noamelk opnoames moaken van mien laidjes en vertelsters en dat is oeteindelk goud lukt. (Doar bin k slim wies mit want der kommen gaauwachteg twij promotiedemo ’s van)    

Om ain uur kwam eerste ploug van n vieftien man/vrouw, over de drumpel
Bie de veurdeur ston n muzikante en verwelkomde t publiek mit de klanken van t Grunneger laid. Ien woonkoamer wazzen zitpoatsen veur vieftien man pebliek. k Heb zundag tot en mit haalfvief vaaier blokjes van elk omtrint n haalf uur heuren loaten en dat hebk  ale keren mit aaibels veul genougen doan.

Organisoatsie haar dik tevreden west mit zesteg luusteroars mor oeteindelk
hebben zok roem neengteg  minsen aanmeld om t spitoakel mit te moaken. 
Pet oaf veur de perfekte organisoatsie en as Kantens kommende joaren deurzet mit dit festival, zel ik veurvast bie de luusteroars heuren want dat
was veur mie as dailnemer vanzulf t ainege watter aan scheelde  

 Groutnis

Zet n reaktie op stee

Velden mit n * binnen verplicht

< Terug noar overzicht van mien Dagbouk