Kreeg ik guster mor zo n meeltje van Free Westerhoff.  As ik Free zien site bekiek, din is Free n soort veelpleger. Gain krimineel vanzulf, en zeker gain draaideurkrimineel mor wel n draaideurdounder.  Free is schriever/dichter/zanger/filmer en ook nog scheuvelloper. Veuraal dat scheuvellopen van Free vervult mie mit ontzag want Free het al tig moalen mitdoan aan twijhonderdkilemetertochten. (Weissensee en zowat meer)

Wat dat scheuvellopen veur miezulf betreft; ik bin nog smui en vereg zat mor zo gaauw dat ik mien scheuvels onder heb, krigt mien zulfvertraauwen n
giga opdonder, zodoaneg datter van mien moteriek mor waaineg overblift.

Eerste dag blief ik hail veurzichteg nog stief ien t  ìn
Dat scheuvellopen van mie….ik moak der gain geluud bie, mor aans zols zeggen:”Doar gaait Jo cocker ien Concert.”

Twijde dag woag ik mie aan t overstappen ien de bochten en as dat goud gaait din gaait t aanderdoags zeker woar glad verkeerd. Din wor ik noamelk wat overmoudeg en van dij gevolgen probaaier ik n wat daipere zit. Deur de knijen…. nog wat meer deur de knijen…. kont achteroet en oh hurre …handen op rug….doar gaait t hin. Tinie kin der mor beter doalek mit de verbanddeus achter aan.
Ik heb gewoon gain gevuil veur evenwicht. Evenwichteghaid zit hom bie mie aigelks allind mor ien t feit dat ik net zo voak op mien veurheufd te lande kom as op mien achterheufd. Mor wat dut t ook òf….ik blief t probaaiern en wat telt dat binnen de momenten dat t lukt…..of is t ook mor veur n poar SEKONNEN

                                    ………………………

Sekonnen

Sekonnen as dinkjes – as brobbeltjes zaip
Sekonnen as krinkjes – van regen op t daip
Mor zo weer verswonnen – as of der niks was
Geluud van sekonnen – van hoagel aan t glas
Sekonnen as blomkes – zo fien en zo klain
Sekonnen as klompkes – rad over t schoulplain
Sekonnen mit vleugels – n swaarm op de vlucht
n Vlucht zunder teugels – t is mor n zucht

Ik mag nog geern mit die over stroat
Sums en din – as t even kin – ien de moat
Sums tussendeur – of der veur – of net even te loat

Sekonnen as muskes – der aaltied weer maank
Sekonnen as kuskes – ien duustern op baank
Sekonnen ien riegen – as swalfkes op droad
Nog nooit heurd van swiegen – mor aal aan de proat
Sekonnen as wupkes – van t widde kenien
Sekonnen as drupkes – van t steertje rooi wien
Verloren sekonnen – al laang achter n deur
Bie touvaal weer vonnen – herkend aan n geur

Ik mag nog geern mit die over stroat
Sums en din – as t even kin – ien de moat
Sums tussendeur – of der veur- of net even te loat

Sekonnen as kraskes op t ies van t kenoal
Van mutsen mit kwaskes – van n winters verhoal
Sekonnen dij stilstoan ien t zundagse uur
Sekonnen dij deurgoan – dij dansen as vuur
Sekonnen as kaarfkes – liek ien mien gemoud
Sekonnen as schaarfkes – mor t kwam nog weer goud
Verloren of wonnen: Dat is t oaventuur
Sums binnen der sekonnen van laangere duur 

Ik mag nog geern mit die over stroat
Sums en din – as t even kin – ien de moat
Sums tussendeur – of der veur – of net even te loat

Groutnis