Oh dij stoere beguntied dou ons Laimeneer n kosmies ogenblikje veur zien spaigel ston.
Zo stoens en lelk dat hai zokzulf nait velen kon.
Verheerd en riddersloagen – vruig hai: “Mag ik mie vroagen?
Din zeg mie even wat mie scheelt”
“Din luuster”‘, zee zien spaigelbeeld.
“De woarhaid is – ie doun te min veur ain dij ales wait en kin
Ie kommen om van ainzoamhaid.
Leg doalek deel joen vroren klaid
Ien stee van te verleppen
Pak op joen raif en scheppen!”

Dou muik de Heer zok hail gewoon
t Ain en aal
t Mooi en maal
De onderwaal
De wottervaal
De tudeltoan
De doezendschoon
Dat muik de Heer zok hail gewoon
Want niks – dat haar der aaid al west
En dat verveelt op t laangelest

……………….

t Genesis volgens Hans van der Lijke

De Here was allain – gain minsen – gain kemelen
Zien laand lag raauw en roeg – zien borg verstaind en kold
n Stee om zok aingoal – ien stilte te vervelen
Tied lag veur anker – tòch – wer hai gestoareg old
Zien put was ain bonk ies – tot aan de bodem vroren
Zien geest verstrooid as zaand – en stof stoof rondomrond
Hai haar zien aigen wies – en zien geleuf verloren
Zien voutstappen der bie – zien schaar – zien vaste grond
De Here was allaain – gain minsen – gain kemelen
Zien laand lag raauw en roeg – zien borg verstaind en kold

Dank joe –  Deo gratias – dank joe veur mien dakterras
Dank joe veur mien D.N.A en veur mien pancreas

t Niks en Haildal Niks – ston vorstvrij ien zien kelder
Ien potten op n plank – en pekeld ien n vat
Ien ainmoal wer t hom dou n ogenblikje helder
En dou wos hai mor zo – van omtrint hou of wat
Ten eersten het hai dou – de aiveghaid oetvonnen
En twijdens tougelieks t Ind zunder Ind bedocht
Dou het hai vot t ain – mit t aandere verbonnen
Zok daardens doar de kleur van t mornrood bie zocht
De Here was allaain – gain minsen – gain kemelen
Zien laand lag raauw en roeg – zien borg verstaind en kold

Dank joe Deo gratias – dank veur de paradepas
Veur de zinkens ien mien knijen- en mien ischyas 

Zien aiveghaid kwam stain veur stain op n vunderen
t Ind zunder ind hoog op – tot boven t gebint
n Mooi – n wonderliek – n groots gebaauw des Heren
Mit steerns aant plevon – en vrij spel veur de wind
En wat hai nog nait dreumd haar – lag op zien beurt te wachten
Ien kleur – meziek en daans – bewegen – ien ballet
n File – mor din aans – n wirrel aan gedachten
Aal onderwegens – aal op zuik noar t alfabet
De Here was allaain – gain minsen gain kemelen
Zien laand lag raauw en roeg – zien borg verstaid en kold

Dank joe Deo gratias – dank joe veur de wotterplas
En veuraal veur aal dat wotter ien mien wotterpas

t Haar aaltied al zo west – dat hai niks zag of heurde
En der nait echt om treuren kon – dat hai nooit wat vernam
Mor dou – op t laangelest – wos hai dat t hom steurde
En hou of dat gebeuren kon datter nooit aine kwam
Van turf oet Kibbelgoarn – van bragel oet Zuudloaren
Van slik en sliek oet Spiek – van kloetjes klaai oet Glins
Van zaand oet t Zaandt en Hoaren – van stof oet Kostverloren
Van zorren oet Zieldiek – muik God de eerste mins.

Dank joe Deo gratias – dank joe wel veur t gewas
En veur Juli-Juli-Julio Iglesias.