Barcelona,

Here willen wie joe loven
Om dis wonderschone stad
Aal joen zegen komt van boven
Mor t wordt hier wel oardeg nat
Dag aan dag roesket joen regen
Wie binnen t aigenlieks meer as zat
Zitten slim om zun verlegen
Hebben ie nait wat aans ien t vat?……………….amen.

Oeteindelek wuir t noa mien gebed, oflopen week ien Barcelona weer wat beter mit t weer. k Heb n hail persoonleke reloatsie mit de Here en dat komt bie zowat goud te pas.
Leste twij doagen konnen parrepluus weer ienklapt. Dou hewwe swaitend en slenternd over o.a., de Nou de la Rambla, genoten van n stad doar kultuur,- kunst,- religie,- architektuur-, en ekonomie aangenoam mit mekoar vertoesterd binnen. n Stad doar t nijmoodse, om ale houken en hurns vervlochten is mit historie.
Wat n riekdom! 

Barcelona,

Is n stoarege jacht
Kin gain ogenblik rust
Is bie dag en bie nacht
As n mieghommelnust
Is n ainzoame smacht
Is n leven- n lust
Is n proal en n pracht
Is n mouten – n must

Muid en voldoan binwe weerom. Net veurdat t gedonder mit de vulkoaniese
Ieslandse aske weer vannijs begunt.
Viva Barcelona!
Viva Catalunya!
Mor Grunnen- en veuraal nDaam, binnen ook mooi!